អ្នកនាំពាក្យក្រសួងការបរទេសកាតាលោក Majed Al-Ansari និយាយនៅថ្ងៃអង្គារនេះថា មាននូវការសម្របសម្រួលក្នុងតំបន់ ហើយកិច្ចខិតខំដែលកំពុងធ្វើឡើង មានគោលបំណងធានាឲ្យបានការបន្ធូរបន្ថយភាពតានតឹងពាក់ព័ន្ធនឹងអ៊ីរ៉ង់ ។

កាលពីថ្ងៃសៅរ៍ចុងសប្តាហ៍កន្លងទៅ នាយករដ្ឋមន្រ្តីកាតាព្រះអង្គម្ចាស់ Sheikh Mohammed bin Abdulrahman al-Thani បានជួបជាមួយមន្រ្តីសន្តិសុខជាន់ខ្ពស់អ៊ីរ៉ង់លោក Ali Larijani នៅទីក្រុងតេអេរ៉ង់ ហើយនិងបានពិនិត្យកិច្ចខិតខំ ដើម្បីបន្ធូរបន្ថយភាពតានតឹងនៅក្នុងតំបន់ ។

លោក Al-Ansari និយាយថា ពាក់ព័ន្ធនឹងដំណើរយាងទស្សនកិច្ចទៅកាន់ទីក្រុងតេអេរ៉ង់របស់នាយករដ្ឋមន្រ្តីកាតា ការប្រាស្រ័យទាក់ទងគ្នា កំពុងធ្វើឡើងនៅក្នុងកម្រិតខ្ពស់បំផុត ដូចដែលពួកយើងបានអះអាងនៅមុននេះ រវាងព្រះចៅមហាម៉ាត់ និងប្រធានាធិបតីអ៊ីរ៉ង់ ។

លោកបន្តថា កិច្ចខិតខំនេះ បានកើតឡើងក្នុងរយៈពេលប៉ុន្មានថ្ងៃកន្លងមកនេះ មិនត្រឹមតែកិច្ចខិតខំរបស់កាតាមួយប៉ុណ្ណោះទេ ប៉ុន្តែដោយភាគីទាំងអស់នៅក្នុងតំបន់ផងដែរ ។ 

លោកថា ជាការពិតណាស់ថា មាននូវទំនាក់ទំនងកម្រិតខ្ពស់ខ្លាំង ដូចដែលអ្នកបានឃើញ ដោយមានគោលដៅកាត់បន្ថយភាពតានតឹងនៅក្នុងតំបន់ និងការការពារវិលត្រឡប់ទៅរកការឡើងកម្តៅភាពតានតឹងវិញ ។

ខណៈពេលនោះដែរ អារ៉ាប់រួម ដែលជាប្រទេសមួយដ៏មានឥទ្ធិពលក្នុងតំបន់ បានជំរុញឲ្យអ៊ីរ៉ង់ និងសហរដ្ឋអាមេរិក ធ្វើកិច្ចព្រមព្រៀងនុយក្លេអ៊ែរ និងឈានដល់ដំណោះស្រាយរយៈពេលវែង ចំពោះភាពតានតឹង មុនពេលការចាប់ផ្ដើមឡើងវិញនូវការចរចា រវាងគូសត្រូវទាំង២ និងបណ្ដារដ្ឋក្នុងតំបន់ ដោយពួកគេធ្វើការសង្កត់ធ្ងន់ថា តំបន់មជ្ឈិមបូព៌ាមិនត្រូវការផ្ទុះសង្គ្រាមមួយផ្សេងនោះទៀតទេ ៕