អ្នកត្រួតពិនិត្យអាវុធរបស់ទីក្រុងមូស្គូ បាននិយាយនៅថ្ងៃអង្គារ (ទី៣ ខែកុម្ភៈ ឆ្នាំ២០២៦) ថា រុស្ស៊ីត្រៀមខ្លួនរួចជាស្រេច សម្រាប់ការពិតថ្មីនៃពិភពលោកមួយដែលគ្មានការកម្រិតការគ្រប់គ្រងអាវុធនុយក្លេអ៊ែរ រវាងសហរដ្ឋអាមេរិក និងរុស្ស៊ី បន្ទាប់ពីសន្ធិសញ្ញា New START ផុតកំណត់នៅសប្តាហ៍នេះ។

ប្រសិនបើមិនមានការដល់ឈានដល់ការយោគយល់គ្នានៅនាទីចុងក្រោយទេនោះ ភាគីទាំង២ នឹងត្រូវទុកឲ្យគ្មានការរឹតបន្តឹងណាមួយ លើឃ្លាំងអាវុធនុយក្លេអ៊ែរយុទ្ធសាស្ត្ររយៈចម្ងាយឆ្ងាយរបស់ពួកគេ ដែលជាលើកដំបូងក្នុងរយៈពេលជាងកន្លះសតវត្សរ៍ នៅពេលដែលសន្ធិសញ្ញា New START ផុតកំណត់នៅថ្ងៃព្រហស្បតិ៍នេះ។

ក្នុងអំឡុងពេលធ្វើទស្សនកិច្ច នៅទីក្រុងប៉េកាំង ប្រទេសចិន សម្រាប់ «ការពិគ្រោះយោបល់ស្ថិរភាពយុទ្ធសាស្ត្រ» អនុរដ្ឋមន្ត្រីការបរទេសរុស្ស៊ី លោក Sergei Ryabkov ដែលត្រួតពិនិត្យបញ្ហាគ្រប់គ្រងអាវុធ បានប្រាប់ទីភ្នាក់ងារសារព័ត៌មានរុស្ស៊ីថា៖ «នេះគឺជាពេលវេលាថ្មី ការពិតថ្មី យើងបានត្រៀមខ្លួនរួចហើយ»។

សន្ធិសញ្ញា New START ដែលកំណត់ការដាក់ពង្រាយចំនួនក្បាលគ្រាប់យុទ្ធសាស្ត្រឲ្យនៅត្រឹម ១.៥៥០គ្រាប់ ត្រូវបានចុះហត្ថលេខានៅឆ្នាំ២០១០។

នៅក្នុងការអត្ថាធិប្បាយទៅកាន់សារព័ត៌មាន New York Times កាលពីខែមុន ប្រធានាធិបតីអាមេរិក លោក Donald Trump បានប្រាប់ថា លោកនឹងព្រមឲ្យសន្ធិសញ្ញានេះផុតកំណត់ជាធម្មតា។ ប៉ុន្តែលោកមិនទាន់បានឆ្លើយតបជាផ្លូវការ ចំពោះសំណើរបស់រុស្ស៊ី ដែលស្នើឲ្យបន្តគោរពតាមលក្ខខណ្ឌកម្រិតមីស៊ីល និងក្បាលគ្រាប់នុយក្លេអ៊ែររបស់សន្ធិសញ្ញានេះរយៈពេលមួយឆ្នាំទៀត ដើម្បីទុកពេលធ្វើការ ដើម្បីសម្រេចថា តើត្រូវធ្វើអ្វីបន្ទាប់ពីសន្ធិសញ្ញាផុតកំណត់។

តែយ៉ាងណាក្ដី លោក Ryabkov ត្រូវបានដកស្រង់សម្តីដោយសារព័ត៌មាន TASS នៅទីក្រុងប៉េកាំង ដែលបានថា «ការមិនផ្ដល់ចម្លើយ ក៏ជាចម្លើយមួយដែរ»៕