នៅថ្ងៃអង្គារ (ទី៣ ខែកុម្ភៈ ឆ្នាំ២០២៦) នេះ ស្ថាប័នប្រតិបត្តិការពាណិជ្ជកម្មផ្លូវសមុទ្រចក្រភពអង់គ្លេស (UKMTO) បានប្រាប់ឲ្យដឹងថា ទូកប្រដាប់អាវុធមួយក្រុម បានព្យាយាមស្ទាក់នាវា ១គ្រឿង នៅចម្ងាយ ១៦ម៉ាយល៍ណត់ (២៩,៦គីឡូម៉ែត្រ) នៅភាគខាងជើងនៃប្រទេសអូម៉ង់។

UKMTO បានឲ្យដឹងថា ខ្លួនកំពុងស៊ើបអង្កេតឧប្បត្តិហេតុនេះ ដែលបានកើតឡើងនៅពេលទៅដល់ខ្សែផ្លូវបែងចែកនាវាចរណ៍ចូលច្រកសមុទ្រ Hormuz។

ទីភ្នាក់ងារនេះបានបន្ថែមថា នាវាប្រដាប់អាវុធតូចៗជាច្រើនគ្រឿង បានព្យាយាមទាក់ទងនាវាតាមរយៈវិទ្យុ VHF ប៉ុន្តែនាវាមិនអើពើនឹងការឲ្យឈប់ឡើយ ហើយបន្តដំណើរតាមផ្លូវដែលបានគ្រោងទុករបស់ខ្លួន។ 

ច្រកសមុទ្រនេះភ្ជាប់ឈូងសមុទ្រពែរ្សទៅនឹងឈូងសមុទ្រអូម៉ង់ និងសមុទ្រអារ៉ាប់។ សមាជិករបស់អង្គការ OPEC គឺអារ៉ាប៊ីសាអ៊ូឌីត អ៊ីរ៉ង់ អេមីរ៉ាតអារ៉ាប់រួម គុយវ៉ែត និងអ៊ីរ៉ាក់ នាំចេញប្រេងឆៅភាគច្រើនរបស់ពួកគេតាមរយៈច្រកសមុទ្រនេះ ដែលភាគច្រើនទៅកាន់តំបន់អាស៊ី។

នាវាចំនួន ៣គ្រឿង ដោយ ២គ្រឿង នៅឆ្នាំ២០២៣ និង ១គ្រឿង នៅឆ្នាំ២០២៤ ត្រូវបានអ៊ីរ៉ង់រឹបអូស នៅជិត ឬនៅក្នុងច្រកសមុទ្រនេះ។ ការរឹបអូសមួយចំនួន បានកើតឡើងបន្ទាប់ពីមានការរឹបអូសនាវាដឹកប្រេងរបស់សហរដ្ឋអាមេរិកដែលជាប់ទាក់ទងនឹងអ៊ីរ៉ង់៕