អង្គការណាសា និយាយនៅថ្ងៃអង្គារនេះថា ពួកគេបានកំណត់យកខែមីនាជាការចាប់ផ្តើមបេសកកម្ម Artemis 2 ដើម្បីបញ្ជូនអវកាសយានិក ៤នាក់ ទៅជុំវិញឋានព្រះចន្ទ ក្រោយពន្យាពេលការចាកចេញក្នុងសប្តាហ៍នេះ បន្ទាប់ពីការលេចធ្លាយអ៊ីដ្រូសែនរាវ អំឡុងការធ្វើតេស្តត្រៀមខ្លួនបាញ់បង្ហោះ ។

បេសកកម្មនេះ គឺជាបេសកកម្មទី ២ នៅក្នុងកម្មវិធីឋានព្រះចន្ទតម្លៃរាប់ពាន់លានដុល្លារ បន្ទាប់ពីការហោះហើរគ្មានមនុស្សកាលពីឆ្នាំ ២០២២ ហើយវាក៏ជាការហោះហើរលើកដំបូង ក្នុងការនាំក្រុមអវកាសយានិកទៅជុំវិញព្រះចន្ទ ក្នុងដំណើររយៈពេល ១០ថ្ងៃ ទៅកាន់ទីតាំងមានមនុស្សជិតបំផុតពុំធ្លាប់មាន នៅទីអវកាស ។

អង្គការណាសា និយាយថា ការលេចធ្លាយនេះ កើតមាននៅចំណុចប្រទាក់ដែលប្រើប្រាស់ ដើម្បីបញ្ជូនសារធាតុជំរុញគ្រីយ៉ូសែនចូលទៅក្នុងដំណាក់កាលស្នូលនៃយានចម្លង ។

លោក Jared Isaacman គឺជាអ្នកគ្រប់គ្រងអង្គការណាសា និយាយនៅក្នុងសារបង្ហោះលើបណ្តាញព័ត៌មានសង្គម Xថា ការធ្វើតេស្តទាំងនេះ ត្រូវបានធ្វើឡើង ដើម្បីស្វែងរកបញ្ហា មុនពេលការហោះហើរ និងការកំណត់ថ្ងៃបាញ់បង្ហោះ ជាមួយសមត្ថភាពជោគជ័យខ្ពស់បំផុត ។

លោកបន្តថា ពួកយើងរំពឹងថា នឹងធ្វើតេស្តការត្រៀមខ្លួនមុពេលហោះហើរ ១លើកបន្ថែមទៀត ហើយបន្ទាប់មកនឹងកំណត់ធ្វើការហោះហើររនៅខែមីនា ។

បេសកកម្មដែលមានការចូលរួមពីអវកាសយានិកសហរដ្ឋអាមេរិក ៣រូប និងអវកាសយានិកកាណាដាមួយរូបនេះដែរ គឺជាការធ្វើតេស្តចំពោះការចុះចតឋានព្រះចន្ទរបស់អវកាសយានិកលើកដំបូង ចាប់តាំងពីឆ្នាំ ១៩៧២ ៕