មន្រ្តីរដ្ឋការប្រហែល ៤ពាន់នាក់នៅក្នុងប្រទេសឥណ្ឌូនេស៊ី នឹងចូលរួមវគ្គហ្វឹកហ្វឺនយោធា នៅឆមាសដំបូងក្នុងឆ្នាំ ២០២៦នេះ ក្រោមផែនការរដ្ឋាភិបាល ដើម្បីធ្វើឲ្យពួកគេរួមចំណែកនៅក្នុងក្រុមបម្រុងយោធា ។

រដ្ឋមន្រ្តីក្រសួងការពារជាតិឥណ្ឌូនេស៊ីលោក Sjafrie Sjamsoeddin បាននិយាយកាលពីថ្ងៃសៅរ៍សប្តាហ៍មុនថា កម្មវិធីនេះ មានគោលដៅលើកកម្ពស់ស្មារតីជាតិនិយម និងស្មារតីបម្រើប្រទេសជាតិឲ្យកាន់តែរឹងមាំជាងមុន ។

លោកបន្តថា អ្នកចូលរួមនឹងមានអាយុចាប់ពី ១៨ឆ្នាំ ដល់ ៣៥ឆ្នាំ ហើយនិងចូលរួមវគ្គបណ្តុះបណ្តាលយោធាមូលដ្ឋាននៅតាមដំណាក់កាល ។

លោកនិយាយទៀតថា ពួកគេនឹងមិនជំនួសយោធាឥណ្ឌូនេស៊ីអនុវត្តន៍កាតព្វកិច្ចការពារជាតិស្នូលនោះទេ ហើយនិងវិលត្រឡប់ទៅកាន់ស្ថាប័នរដ្ឋរបស់ពួកគេវិញ ក្រោយបញ្ចប់ការហ្វឹកហាត់ ។

លោក Sjafrie បានបញ្ជាក់ថា ពួកយើងនឹងចាប់ផ្តើមបណ្តុះបណ្តាលមន្រ្តីរដ្ឋការនៅឆមាសដំបូងក្នុងឆ្នាំ ២០២៦ ហើយនិងផ្តោតសំខាន់លើអ្នកដែលមកពីតាមក្រសួង សម្រាប់រយៈពេលឆមាសដំបូងនេះ ។

លោក Rico Ricardo Sirait គឺជាអ្នកនាំពាក្យក្រសួងការពារជាតិឥណ្ឌូនេស៊ី និយាយប្រាប់កាសែត Jakarta Postកាលពីថ្ងៃចន្ទថា វគ្គហ្វឹកហ្វឺននេះ ទំនងជាចាប់ផ្តើមនៅខែមេសា ប៉ុន្តែរឿងរ៉ាវលម្អិតនៃកម្មវិធី និងច្បាប់កូតាសម្រាប់អ្នកចូលរួមស្ថាប័នរដ្ឋ នៅដោះស្រាយបន្តទៀត ៕