មន្រ្តីជាន់ខ្ពស់មួយរូបរបស់រុស្ស៊ីនិយាយថា ទីក្រុងមូស្គូ ត្រៀមខ្លួនរួចរាល់ក្នុងការឆ្លើយតប បើសិនជាទីក្រុងវ៉ាស៊ីនតោន បញ្ចូនអាវុធរបស់ខ្លួនទៅកាន់កោះ Greenland ។

លោក Sergey Ryabkov គឺជាអនុរដ្ឋមន្រ្តីការបរទេសរុស្ស៊ីនិយាយថា រុស្ស៊ីនឹងចាត់វិធានការផ្នែកយោធា បើសិនជាសហរដ្ឋអាមេរិក ធ្វើតាមសំណើ ដើម្បីដាក់ពង្រាយកម្មវិធីការពារមូស៊ីល Golden Dome របស់ខ្លួនទៅកាន់កោះនៅតំបន់អាក់ទិកមួយនេះ ។

ទីភ្នាក់ងារព័ត៌មានរដ្ឋរុស្ស៊ី TASS រាយការណ៍ថា លោក Ryabkov បានធ្វើសេចក្តីអត្ថាធិប្បាយបែបនេះទៅកាន់ក្រុមអ្នកសារព័ត៌មាននៅស្ថានទូតរុស្ស៊ីប្រចាំនៅប្រទេសចិននាថ្ងៃអង្គារនេះ ។ 

សេចក្តីអត្ថាធិប្បាយរបស់លោក បានកើតមាន រយៈពេល ២ថ្ងៃ មុនពេលថ្ងៃផុតកំណត់នៃសន្ធិសញ្ញានុយក្លេអ៊ែរ New START ដែលជាកតិសញ្ញាគ្រប់គ្រងអាវុធនុយក្លេអ៊ែរសេសសល់ចុងក្រោយគេបង្អស់រវាងទីក្រុងវ៉ាស៊ីនតោន និងទីក្រុងមូស្គូ ។

លោក Ryabkov និយាយថា បើសិនជាអាមេរិកសម្រេចបញ្ជូនប្រព័ន្ធអាវុធមួយចំនួនរបស់ពួកគេទៅកាន់តំបន់នោះ ឬដាក់ពង្រាយប្រព័ន្ធមីស៊ីល Golden Dome របស់ពួកគេនៅកោះ Greenland វានឹងក្លាយជាស្ថានភាពដែលត្រូវការវិធានការយោធា និងបច្ចេកទេស ហើយក្រុមជំនាញរបស់ពួកយើង នឹងត្រៀមខ្លួនរួចរាល់ ដើម្បីចាត់វិធានការទាំងនេះ ។

សេចក្តីអត្ថាធិប្បាយនេះ បានកើតមានឡើង បន្ទាប់ពីអនុសាសន៍របស់ប្រធានាធិបតីសហរដ្ឋអាមេរិកលោក Donald Trump កាលពីខែមុនថា កិច្ចពិភាក្សាត្រូវបានធ្វើឡើង ពាក់ព័ន្ធនឹងប្រព័ន្ធមីស៊ីល Golden Dome ដែលជាកម្មវិធីការពារមីស៊ីលពហុស្រទាប់ស្នើសុំរបស់ទីក្រុងវ៉ាស៊ីនតោន មានបំណងបញ្ចប់នៅដំណាច់អាណត្តិរបស់លោក Trump ក្នុងឆ្នាំ ២០២៩ ពេលដែលពួកគេគ្រប់គ្រងកោះ Greenland ៕