សេតវិមានបាននិយាយកាលពីថ្ងៃអង្គារ៣កុម្ភៈសប្ដាហ៍នេះថា សហរដ្ឋអាមេរិកនៅតែកំពុងបន្តរៀបចំផែនការចរចាជាមួយក្រុមមន្ត្រីអ៊ីរ៉ង់នៅសប្តាហ៍នេះ សូម្បីតែបន្ទាប់ពីយន្តហោះចម្បាំងអាមេរិកបានបាញ់ទម្លាក់យានដ្រូនរបស់អ៊ីរ៉ង់ដែលបានចូលទៅជិតនាវាផ្ទុកយន្តហោះអាមេរិកមួយគ្រឿងនៅក្នុងសមុទ្រអារ៉ាប់ក៏ដោយ។

អ្នកនាំពាក្យសេតវិមាន លោកស្រី កូរ៉ូឡាញ ឡេវីត (Karoline Leavitt) បានប្រាប់ក្រុមអ្នកសារព័ត៌មានថា លោកស្រីទើបតែបាននិយាយជាមួយបេសកជនពិសេសលោក Steve Witkoff ហើយកិច្ចចរចាទាំងនេះគិតត្រឹមពេលនេះនៅតែត្រូវបានកំណត់ពេលដដែល ដោយបន្ថែមថាជំនួបទាំងនោះគ្រោងនឹងកើតឡើងនៅថ្ងៃសុក្រចុងសប្តាហ៍នេះ។  

លោកស្រី ឡេវីត  បាននិយាយនៅខាងក្រៅការិយាល័យ West Wing នៃសេតវិមានថាប្រធានាធិបតី Trump តែងតែចង់បន្តការទូតជាមុនសិន ប៉ុន្តែជាក់ស្តែងភាគីទាំងពីរត្រូវតែចូលរួម។

ប្រភពមួយដែលស្និទ្ធនឹងបញ្ហានេះបានប្រាប់សារព័ត៌មាន AFP ថា កិច្ចប្រជុំរវាងលោក Witkoff ជាអ្នកជំនួញម្នាក់ដែលលោក Trump បានតែងតាំងជាអ្នកចរចាជម្លោះសកលដ៏សកម្មរបស់លោក និងមន្ត្រីអ៊ីរ៉ង់ ប្រហែលជានឹងធ្វើឡើងនៅក្នុងប្រទេសទួរគី។  

យោធាអាមេរិកបាននិយាយមុននេះថា យន្តហោះចម្បាំងបំបាំងកាយ F-35C បានបាញ់ទម្លាក់យានដ្រូនរបស់អ៊ីរ៉ង់ដែលបានចូលទៅជិតនាវាផ្ទុកយន្តហោះ USS Abraham Lincoln កាលពីថ្ងៃអង្គារ។

អ្នកនាំពាក្យរបស់លោក Trump រូបនេះបានបន្ថែមថា ប្រធានាធិបតីអាមេរិកកំពុងរក្សាការបើកចំហចំពោះលទ្ធភាពនៃសកម្មភាពយោធាប្រឆាំងនឹងអ៊ីរ៉ង់ ដោយមាននាវាចម្បាំងអាមេរិកមួយចំនួនធំនៅក្នុងតំបន់នេះ រួចទៅហើយ៕