នាយករដ្ឋមន្ត្រីអ៊ីស្រាអែល លោក Benjamin Netanyahu បានប្រាប់បេសកជនពិសេសអាមេរិក លោក Steve Witkoff កាលពីថ្ងៃអង្គារ (៣ កុម្ភៈ) ទីក្រុងតេអេរ៉ង់ ទំនងជាមិនគោរពតាមកិច្ចព្រមព្រៀងណាមួយដែលអាចកើតមាននោះទេ ស្របពេលកិច្ចប្រឹងប្រែងដើម្បីធ្វើឱ្យផ្លូវការទូតរស់រានឡើងវិញលើកម្មវិធីនុយក្លេអ៊ែររបស់អ៊ីរ៉ង់ និងសេចក្ដីរាយការណ៍ពីការបន្តកិច្ចចរចាឡើងវិញក្នុងសប្ដាហ៍នេះ។

សេចក្តីថ្លែងការណ៍មួយពីការិយាល័យរបស់នាយករដ្ឋមន្ត្រីអ៊ីស្រាអែល បាននិយាយថា៖ ក្នុងកិច្ចប្រជុំជាមួយប្រេសិតអាមេរិក លោក Netanyahu «បានបញ្ជាក់យ៉ាងច្បាស់ពីជំហររបស់លោកថា អ៊ីរ៉ង់បានបង្ហាញឱ្យឃើញម្តងហើយម្តងទៀតថា ការសន្យារបស់ខ្លួនមិនអាចទុកចិត្តបានឡើយ»។ ប្រភពពីមន្ត្រីអ៊ីស្រាអែលពីររូប បាននិយាយថា កិច្ចប្រជុំនេះក៏មានការចូលរួមពីប្រធានទីភ្នាក់ងារចារកម្មអ៊ីស្រាអែល លោក David Barnea រដ្ឋមន្ត្រីក្រសួងការពារជាតិ លោក Israel Katz និងមេបញ្ជាការយោធា លោក Eyal Zamir ផងដែរ។

ប្រភពព័ត៌មានអ៊ីរ៉ង់ បានប្រាប់សារព័ត៌មានរ៉យទ័រកាលពីសប្តាហ៍មុនថា លោកប្រធានាធិបតីអាមេរិក Donald Trump បានកំណត់លក្ខខណ្ឌបីសម្រាប់ការបន្តកិច្ចចរចាឡើងវិញ ដូចជា ទី១គឺការចម្រាញ់សារធាតុអ៊ុយរ៉ានីញ៉ូមត្រូវតែស្មើសូន្យនៅអ៊ីរ៉ង់ ទី២គឺការដាក់ដែនកំណត់លើកម្មវិធីមីស៊ីលបាលីស្ទិករបស់ទីក្រុងតេអេរ៉ង់ និងលក្ខខណ្ឌទី៣ គឺអ៊ីរ៉ង់ត្រូវតែបញ្ចប់ការគាំទ្ររបស់ខ្លួនចំពោះក្រុមប្រយុទ្ធតំណាង (ប្រូកស៊ី) ក្នុងតំបន់ ដែលទាំងអស់នេះសុទ្ធសឹងតែស្របតាមការទាមទារដ៏យូរអង្វែងរបស់អ៊ីស្រាអែល។

អ៊ីរ៉ង់បាននិយាយជាយូរមកហើយថា ការទាមទារទាំង ៣នេះគឺជាការរំលោភបំពានលើអធិបតេយ្យភាពរបស់ខ្លួន ដែលមិនអាចទទួលយកបាននោះទេ ប៉ុន្តែប្រភពមន្ត្រីអ៊ីរ៉ង់ពីររូបបានប្រាប់សារព័ត៌មានរ៉យទ័រថា ថ្នាក់ដឹកនាំរបស់អ៊ីរ៉ង់ បានមើលឃើញថា ការទាមទារលើកម្មវិធីមីស៊ីលបាលីស្ទិករបស់ខ្លួនគឺជាឧបសគ្គធំជាងការទាមទារលើសារធាតុអ៊ុយរ៉ានីញ៉ូម៕