ប្រភពការទូតក្នុងតំបន់មជ្ឈិមបូព៌ា បានប្រាប់សារព័ត៌មានរ៉យទ័រកាលពីថ្ងៃអង្គារ (៣ កុម្ភៈ) ថា អ៊ីរ៉ង់កំពុងទាមទារឱ្យកិច្ចចរចាជាមួយសហរដ្ឋអាមេរិក នៅសប្តាហ៍នេះ ត្រូវបានធ្វើឡើងនៅប្រទេសអូម៉ង់ មិនមែននៅប្រទេសទួរគីនោះទេ ហើយថា វិសាលភាពគួរតែត្រូវបានបង្រួមឱ្យតូចមកត្រឹមកិច្ចចរចាទ្វេភាគីលើបញ្ហានុយក្លេអ៊ែរតែប៉ុណ្ណោះ ដែលការចង់បានទាំងនេះបានបន្ថែមភាពស្មុគស្មាញថ្មីៗទៅក្នុងកិច្ចប្រឹងប្រែងការទូតដ៏លំបាករួចទៅហើយ។

បំណងរបស់អ៊ីរ៉ង់ ក្នុងការផ្លាស់ប្តូរទីកន្លែងនិងរបៀបវារៈសម្រាប់កិច្ចចរចា ដែលគ្រោងធ្វើនៅថ្ងៃសុក្រ សប្ដាហ៍នេះក្នុងទីក្រុងអ៊ីស្តង់ប៊ុល បានកើតឡើងស្របពេលមានភាពតានតឹងកាន់តែខ្លាំង ខណៈអាមេរិក កំពុងបង្កើនកម្លាំងនៅមជ្ឈិមបូព៌ា។ បណ្ដាប្រទេសក្នុងតំបន់ បានជំរុញឱ្យមានដំណោះស្រាយការទូតរវាងអាមេរិក និងអ៊ីរ៉ង់ ដែលបានគំរាមវាយប្រហារតាមអាកាសទៅវិញទៅមក និងបង្កភាពភ័យខ្លាចនៃការរីករាលដាលទៅជាសង្គ្រាមកាន់តែទូលំទូលាយ។

លោកប្រធានាធិបតីអាមេរិក Donald Trump បានបញ្ជាក់ថា ទីក្រុងវ៉ាស៊ីនតោនកំពុងចរចាជាមួយភាគីទីក្រុងតេអេរ៉ង់ ប៉ុន្តែមិនបានលម្អិតច្រើនឡើយ ហើយលោកក៏បានបដិសេធ មិនបញ្ជាក់ទីតាំងនៃកិច្ចពិភាក្សានោះដែរ។ អ្នកការទូតក្នុងតំបន់ ដែលដឹងពីការទាមទាររបស់អ៊ីរ៉ង់ បាននិយាយថា ទីក្រុងតេអេរ៉ង់ ចង់បាន «ការផ្លាស់ប្តូរទម្រង់ ពួកគេចង់ផ្លាស់ប្តូរវិសាលភាព» នៃកិច្ចចរចា។

ប្រភពបន្តថា «អ៊ីរ៉ង់ចង់ពិភាក្សាតែអំពីឯកសារនុយក្លេអ៊ែរជាមួយអាមេរិកតែប៉ុណ្ណោះ ខណៈដែលអាមេរិក ចង់រួមបញ្ចូលប្រធានបទផ្សេងទៀត ដូចជាមីស៊ីលបាលីស្ទីក និងសកម្មភាពរបស់ក្រុមប្រយុទ្ធតំណាង (ប្រូកស៊ី) របស់អ៊ីរ៉ង់ នៅក្នុងតំបន់»។ ក្រៅពីសមាសភាពមន្រ្តីជាន់ខ្ពស់អាមេរិក ក៏មានរដ្ឋមន្ត្រីមកពីប្រទេសជាច្រើនទៀតក្នុងតំបន់ រួមមានប៉ាគីស្ថាន អារ៉ាប៊ីសាអ៊ូឌីត កាតា អេហ្ស៊ីប និងអារ៉ាប់រួម ត្រូវបានរំពឹងថានឹងចូលរួមផងដែរ ប៉ុន្តែប្រភពក្នុងតំបន់បានបញ្ជាក់ប្រាប់សារព័ត៌មានរ៉យទ័រថា ឥឡូវនេះ ទីក្រុងតេអេរ៉ង់ចង់បានតែកិច្ចចរចាទ្វេភាគីជាមួយទីក្រុងវ៉ាស៊ីនតោនប៉ុណ្ណោះ៕