លោក Mark Rutte អគ្គលេខាធិការអង្គការណាតូបាននិយាយកាលពីថ្ងៃទី ៣ ខែកុម្ភៈ សប្ដាហ៍នេះថា លោកមានទំនុកចិត្តថាសម្ព័ន្ធមិត្តនឹងបែងចែកថវិកាចំនួន ១៥ ពាន់លានដុល្លារនៅឆ្នាំនេះក្រោមបញ្ជីតម្រូវការអាទិភាពរបស់អ៊ុយក្រែន (PURL)។

លោក Rutte បាននិយាយក្នុងអំឡុងពេលសន្និសីទសារព័ត៌មានមួយជាមួយប្រធានាធិបតី Volodymyr Zelenskyy ក្នុងរដ្ឋធានីគីវ នៅពេលសួរអំពីតួលេខដែលអ៊ុយក្រែនស្នើសុំថា រូបលោកពិតជាមានទំនុកចិត្តថាថវិកានឹងមាននៅទីនោះ។

ទីក្រុងគីវ គ្រោងទទួលបានប្រហែល ៤-៥ ពាន់លានដុល្លារកាលពីចុងឆ្នាំ ២០២៥ ក្រោមគំនិតផ្តួចផ្តើមនេះ ដែលអនុញ្ញាតឱ្យសមាជិកណាតូទិញប្រព័ន្ធការពារដែនអាកាស គ្រាប់រំសេវ និងគ្រឿងបរិក្ខារផ្សេងទៀតសម្រាប់អ៊ុយក្រែនពីសហរដ្ឋអាមេរិក។

ប្រមុខសម្ព័ន្ធយោធាណាតូរូបនេះ បាននិយាយថា លោកដឹងថាជាតម្រូវការបន្ទាន់ អ៊ុយក្រែន ត្រូវការច្រើនជាងនេះទៀត ដោយជំរុញឱ្យសម្ព័ន្ធមិត្តប្រើសម្បត្តិក្នុងឃ្លាំងរបស់ពួកគេអស់ពីលទ្ធភាពដើម្បីផ្តល់ជូនអ្វីដែលពួកគេអាចធ្វើបានក្នុងការបំពេញតម្រូវការរបស់អ៊ុយក្រែន ជាពិសេសប្រព័ន្ធការពារដែនអាកាស។

លោកបានគូសបញ្ជាក់ថា សម្ព័ន្ធមិត្តណាតូពីរភាគបីឥឡូវនេះកំពុងចូលរួមក្នុងគំនិតផ្តួចផ្តើមនេះ។ លោកក៏បានអំពាវនាវឱ្យមានការចែករំលែកបន្ទុកដោយយុត្តិធម៌ជាងមុន ខណៈបានគូសបញ្ជាក់ពីការចូលរួមវិភាគទានពីប្រទេសតំបន់ Nordic ប្រទេសនៅតំបន់ Baltic ហូឡង់ កាណាដា និងអាល្លឺម៉ង់។

លោក Denys Shmyhal រដ្ឋមន្ត្រីក្រសួងការពារជាតិអ៊ុយក្រែន បាននិយាយកាលពីខែធ្នូឆ្នាំមុនថា ប្រទេសនេះត្រូវការជំនួយក្រោមបញ្ជីតម្រូវការអាទិភាពរបស់អ៊ុយក្រែនចំនួន១៥ពាន់លានដុល្លារបន្ថែមទៀត ពេញមួយឆ្នាំ ២០២៦ ដើម្បីទប់ទល់ការវាយប្រហាររបស់រុស្ស៊ីដែលកំពុងបន្ត៕