ក្រុមហ៊ុនសន្តិសុខដែនសមុទ្ររបស់អង់គ្លេស Vanguard Tech បាននិយាយកាលពីថ្ងៃអង្គារ ទី៣ ខែកុម្ភៈ ថា នាវាដឹកប្រេងបំពាក់ទង់ជាតិអាមេរិកមួយគ្រឿងត្រូវបានទូកបំពាក់អាវុធរបស់អ៊ីរ៉ង់ចូលទៅជិត និងប្រឈមមុខនៅច្រកសមុទ្រ Hormuz មុនពេលបន្តដំណើរទៅមុខ។

ក្រុមហ៊ុនបាននិយាយថា នាវា Stena Imperative ត្រូវបានទូកប្រដាប់អាវុធតូចៗចំនួន៦គ្រឿងរបស់កងឆ្មាំបដិវត្តន៍ ចូលទៅជិត ខណៈកំពុងឆ្លងកាត់ច្រកសមុទ្រក្នុងចម្ងាយប្រហែល៣០គីឡូម៉ែត្រ ភាគខាងជើងប្រទេសអូម៉ង់។

ក្រុមហ៊ុនបាននិយាយបន្ថែមថា ទូកបំពាក់អាវុធទាំងនោះបានហៅតាមវិទ្យុទាក់ទង ដោយបញ្ជាឱ្យប្រធាននាវា «ពន្លត់ម៉ាស៊ីន ហើយបានប្រុងឡើងលើនាវា» ប៉ុន្តែនាវាបានបង្កើនល្បឿននិងរក្សាទិសដៅ ដោយសង្កត់ធ្ងន់ថា នាវាមិនបានចូលទៅក្នុងដែនទឹករបស់អ៊ីរ៉ង់ទេ។ ក្រុមហ៊ុន Vanguard Tech បាននិយាយថា «នាវា នៅពេលនេះ កំពុងត្រូវបានអមដំណើរដោយនាវាចម្បាំងសហរដ្ឋអាមេរិក»។

ទីភ្នាក់ងារសារព័ត៌មានអ៊ីរ៉ង់ Fars បាននិយាយថា នាវាមួយគ្រឿង ដែលមិនបានបញ្ជាក់សញ្ជាតិរបស់ខ្លួន បានចូលទៅក្នុងដែនទឹករបស់ប្រទេសនៅច្រកសមុទ្រ Hormuz ដោយខុសច្បាប់ ដែលនៅពេលនោះ អង្គភាពអ៊ីរ៉ង់ «បានស្នើសុំ» ឲ្យនាវាបង្ហាញការអនុញ្ញាតជាចាំបាច់។

ទីភ្នាក់ងារសារព័ត៌មាន Fars បាននិយាយថា «នាវានេះ មិនមានការអនុញ្ញាតស្របច្បាប់ឱ្យស្ថិតនៅក្នុងដែនទឹកទាំងនេះទេ»។ «ដូច្នេះនាវាត្រូវបានព្រមាន ហើយចាកចេញពីដែនទឹកអ៊ីរ៉ង់ភ្លាមៗ»។

ច្រកសមុទ្រនេះ ជាផ្លូវឆ្លងកាត់ដ៏សំខាន់សម្រាប់ការដឹកជញ្ជូនប្រេង និងឧស្ម័នធម្មជាតិរាវនៅទូទាំងពិភពលោក គឺជាកន្លែងកើតហេតុនៃឧប្បត្តិហេតុជាច្រើនកាលពីពេលមុនៗ។