លោក Antonio Guterres ប្រមុខអង្គការសហប្រជាជាតិ បានអំពាវនាវជាថ្មីម្តងទៀតដល់អ៊ីស្រាអែល ឱ្យអនុញ្ញាតជំនួយមនុស្សធម៌បានចូលទៅក្នុងតំបន់ហ្កាហ្សាជាបន្ទាន់ ខណៈអាជ្ញាធរអ៊ីស្រាអែល បន្តរារាំងប្រជាជនប៉ាឡេស្ទីនរាប់សិបនាក់មិនឲ្យចាកចេញពីតំបន់ដែលរងការបំផ្លិចបំផ្លាញដោយសង្គ្រាមដើម្បីស្វែងរកការព្យាបាល។

លោក Guterres បានធ្វើការអំពាវនាវកាលពីថ្ងៃអង្គារ ខណៈប្រជាជនប៉ាឡេស្ទីនមានជំងឺ និងរបួសជាង ១០០នាក់បានមកប្រមូលផ្តុំគ្នានៅច្រកឆ្លងកាត់រ៉ាហ្វាដែលទើបបើកឡើងវិញរវាងតំបន់ហ្កាហ្សា និងប្រទេសអេហ្ស៊ីប ដោយសង្ឃឹមថានឹងទទួលបានការថែទាំសុខភាពនៅបរទេស។

លោក Guterres បានថ្លែងនៅទីស្នាក់ការកណ្តាលអង្គការសហប្រជាជាតិនៅទីក្រុងញូវយ៉ក ថា «ខ្ញុំសូមអំពាវនាវឱ្យមានការសម្របសម្រួលសម្រាប់ការឆ្លងកាត់ជំនួយមនុស្សធម៌ឲ្យបានឆាប់រហ័សនិងគ្មានការរារាំង រួមទាំងតាមរយៈការឆ្លងកាត់ច្រករ៉ាហ្វាផងដែរ»។

ដោយរាយការណ៍ពី ទីក្រុង Khan Younis ភាគខាងត្បូងតំបន់ហ្កាហ្សា អ្នកសារព័ត៌មាន Al Jazeera បាននិយាយថា មានតែប្រជាជនប៉ាឡេស្ទីន១៦នាក់ប៉ុណ្ណោះត្រូវបានអនុញ្ញាតឱ្យឆ្លងកាត់ចូលទៅក្នុងប្រទេសអេហ្ស៊ីបតាមច្រករ៉ាហ្វាកាលពីថ្ងៃអង្គារ។ នៅមួយថ្ងៃមុននោះ មានតែមនុស្សប្រាំនាក់ប៉ុណ្ណោះដែលត្រូវបានអនុញ្ញាតឱ្យចាកចេញ ខណៈ១២នាក់ត្រូវបានអនុញ្ញាតឱ្យត្រឡប់ទៅតំបន់ហ្កាហ្សាវិញ។ ចំនួននេះទាបជាងចំនួនប្រជាជនប៉ាឡេស្ទីន ៥០នាក់ ដែលមន្ត្រីអ៊ីស្រាអែលបាននិយាយថា នឹងត្រូវបានអនុញ្ញាតឱ្យធ្វើដំណើរក្នុងទិសដៅនីមួយៗតាមច្រកឆ្លងកាត់នេះ។