អ្នកគាំទ្ររដ្ឋាភិបាលរាប់ពាន់នាក់ បានដើរក្បួនឆ្លងកាត់ទីក្រុងការ៉ាកាសប្រទេសវ៉េណេស៊ុយអេឡា កាលពីថ្ងៃអង្គារ ទី៣ ខែកុម្ភៈ ដោយទាមទារឱ្យមានការដោះលែងលោក Nicolas Maduro និងភរិយារបស់ លោក លោកស្រី Cilia Flores ដែលឈានដល់រយៈពេល១ខែចាប់តាំងពីការចាប់ខ្លួនអ្នកទាំងពីរដោយកងកម្លាំងយោធាសហរដ្ឋអាមេរិក។

ការប្រមូលផ្តុំគ្នានេះ ត្រូវបានរៀបចំឡើងដោយគណបក្សសង្គមនិយមរួបរួមរបស់ប្រទេសវ៉េណេស៊ុយអេឡា និងបានទាក់ទាញសមាជិកនៃកងជីវពលបូលីវ៉ា រួមជាមួយអ្នកគាំទ្រដែលកាន់បដា និងពាក់អាវដែលអំពាវនាវឱ្យប្តីប្រពន្ធទាំងពីរនាក់នេះត្រឡប់មកវិញ។ ក្រុមអ្នកតវ៉ាបានបង្ហាញរូបភាពរបស់លោកMaduro ដែលត្រូវបានពិពណ៌នាថាជាតួអង្គវីរបុរសមួយរូប។

លោក Nicolas Maduro Guerra ជាកូនប្រុសរបស់អតីតប្រធានាធិបតីដែលត្រូវបានឃុំខ្លួន បានថ្លែងទៅកាន់អ្នកដើរក្បួនពីវេទិកាមួយដោយបញ្ជាក់ថា ថ្ងៃទី៣ ខែមករា «នឹងនៅតែមានស្លាកស្នាមនៅលើផ្ទៃមុខរបស់យើងជារៀងរហូត» នៅពេលដែល «ទឹកដីកំណើតរបស់យើងត្រូវបានកងទ័ពបរទេសបំពាន»។

លោកបាននិយាយទៅកាន់ហ្វូងមនុស្សថា ប្រជាជនវ៉េណេស៊ុយអេឡា បានបង្កើត «ស្មារតីប្រឆាំងចក្រពត្តិនិយមយ៉ាងជ្រៅ» ហើយកំពុងប្រយុទ្ធប្រឆាំងដើម្បីពង្រឹងគំរូអភិវឌ្ឍន៍ លទ្ធិប្រជាធិបតេយ្យ និងគោលនយោបាយសេដ្ឋកិច្ចរបស់ខ្លួន។

លោក Maduro និងលោកស្រី Flores នៅតែជាប់ឃុំនៅក្នុងពន្ធនាគារសហព័ន្ធសហរដ្ឋអាមេរិក បន្ទាប់ពីការវាយឆ្មក់ចូលរបស់យោធានៅថ្ងៃទី៣ ខែមករា។