សហជីពពាណិជ្ជកម្មនិងដឹកជញ្ជូនមកពីប្រទេសអេក្វាឌ័រ និងកូឡុំប៊ី បានចេញធ្វើបាតុកម្មទៅកាន់ស្ពានអន្តរជាតិ Rumichaca កាលពីថ្ងៃអង្គារ ទី៣ ខែកុម្ភៈ ដោយទាមទារឱ្យប្រធានាធិបតី លោក Daniel Noboa និង លោក Gustavo Petro លុបចោលការដំឡើងពន្ធទើបដាក់កាលពីពេលថ្មីៗនេះ ដែលក្រុមបាតុករនិយាយថាកំពុងបំផ្លាញសេដ្ឋកិច្ចក្នុងស្រុកនិងប្រទេស។

បាតុកម្មរបស់ប្រទេសទាំងពីរ ដែលបានចាប់ផ្តើមនៅពាក់កណ្តាលអធ្រាត្រថ្ងៃទី៣ ខែកុម្ភៈ បានប្រមូលផ្តុំពាណិជ្ជករ អ្នកបើកបររថយន្តដឹកទំនិញ និងអ្នកតំណាងមកពីវិស័យផលិតកម្មផ្សេងៗ ដែលបានធ្វើដំណើរដោយថ្មើរជើងនិងតាមរថយន្តដឹកទំនិញពី ទីក្រុង Tulcan ប្រទេសអេក្វាឌ័រ និងទីក្រុង Ipiales ប្រទេសកូឡុំប៊ី ដែលធ្វើឱ្យចរាចរណ៍នៅព្រំដែនជាប់គាំងមួយផ្នែករយៈពេលជិតបីម៉ោង។ មេដឹកនាំសហជីព បានរិះគន់វិធានការដំឡើងពន្ធ៣០% ដែលត្រូវបានអនុម័តដោយគ្មានការវិភាគជាមុនអំពីផលប៉ះពាល់សេដ្ឋកិច្ច និងសង្គមរបស់ពួកគេ ដោយព្រមានថាការខាតបង់ជាផ្លូវការឡើងកាន់តែខ្ពស់ ជំរុញឱ្យមានការរត់ពន្ធ និងអំពើពុករលួយនៅតាមផ្លូវ ដែលខុសច្បាប់។

លោក Carlos Bastidas ប្រធានសមាគមដឹកជញ្ជូនធុនធ្ងន់ Carchi បានសង្កត់ធ្ងន់ថា វិធានការទាំងនេះធ្វើឲ្យប៉ះពាល់ដល់ឧស្សាហកម្ម និងខ្សែច្រវ៉ាក់ដឹកជញ្ជូនហួសពីខេត្តព្រំដែន Narino និង Carchi នេះបើយោងតាមរបាយការណ៍ប្រព័ន្ធផ្សព្វផ្សាយក្នុងស្រុក។

ក្រុមបាតុករ បានបញ្ចប់ការធ្វើបាតុកម្មរបស់ពួកគេដោយការផ្តល់សេចក្តីថ្លែងការណ៍រួមមួយចុះហត្ថលេខាដោយអង្គការពាណិជ្ជកម្មជាងដប់អង្គការ សភាពាណិជ្ជកម្ម និងការិយាល័យគយ ទៅកាន់អគ្គលេខាធិការនៃសហគមន៍ប្រជាជាតិតំបន់ភ្នំអង់ដោយស្នើសុំការសម្របសម្រួលក្នុងតំបន់ដើម្បីដោះស្រាយជម្លោះពាណិជ្ជកម្ម។