ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃអង្គារ (៣ កុម្ភៈ) ថា អ៊ុយក្រែន កំពុងតែរង់ចាំប្រតិកម្មតបរបស់អាមេរិក ចំពោះការវាយប្រហារទ្រង់ទ្រាយធំពេញមួយយប់របស់រុស្ស៊ី លើទីក្រុងនានារបស់អ៊ុយក្រែន ដែលបណ្តាលឱ្យខូចខាតកាន់តែធ្ងន់ធ្ងរដល់ហេដ្ឋារចនាសម្ព័ន្ធថាមពល ខណៈសេតវិមាននិយាយថា លោកប្រធានាធិបតី Donald Trump ពុំមានការភ្ញាក់ផ្អើលចំពោះរឿងនេះទេ ក្រោយទីក្រុងវ៉ាស៊ីនតោនលើកពីការផ្អាកវាយប្រហារបណ្ដាញថាមពល។

នៅក្នុងសុន្ទរកថាវីដេអូពេលយប់របស់ខ្លួន លោក Zelenskyy បាននិយាយថា៖ ទីក្រុងគីវរំពឹងថា នឹងមានការឆ្លើយតបពីសហរដ្ឋអាមេរិក ចំពោះការវាយប្រហាររបស់រុស្ស៊ី ដោយនោះគឺជាសំណើរបស់អាមេរិក ក្នុងការបញ្ឈប់ការវាយប្រហារលើហេដ្ឋារចនាសម្ព័ន្ធថាមពល ក្នុងអំឡុងកិច្ចខិតខំប្រឹងប្រែងផ្នែកការទូត និងរដូវរងាដ៏ត្រជាក់។ លោក Zelenskyy បន្តថា អ៊ុយក្រែនត្រូវបានគេរំពឹងថានឹងធ្វើសម្បទាន ប៉ុន្តែនេះក៏អាស្រ័យលើសម្បទានពីរុស្ស៊ីផងដែរ។

នៅទីក្រុងវ៉ាស៊ីនតោន អ្នកនាំពាក្យសេតវិមាន លោកស្រី Karoline Leavitt បានប្រាប់អ្នកយកព័ត៌មានថា លោកប្រធានាធិបតី Trump ពុំមានការភ្ញាក់ផ្អើលឡើយចំពោះការវាយប្រហារចុងក្រោយរបស់រុស្ស៊ី លើអ៊ុយក្រែន។ ថ្លែងទៅកាន់អ្នកសារព័ត៌មានកាលពីថ្ងៃអង្គារដដែលនេះ លោក Trump បាននិយាយថា មេដឹកនាំរុស្ស៊ីលោក Vladimir Putin បាន «រក្សាពាក្យសម្ដីរបស់លោក» ទាក់ទងនឹងបទឈប់បាញ់បណ្ដោះអាសន្ន លើការវាយប្រហារប្រឆាំងហេដ្ឋារចនាសម្ព័ន្ធថាមពលរបស់អ៊ុយក្រែន។

វិមានក្រឹមឡាំងធ្លាប់បញ្ជាក់ថា ទីក្រុងមូស្គូ បានយល់ព្រមបញ្ឈប់ការវាយប្រហារជាបណ្តោះអាសន្ននេះ ដោយអ្នកនាំពាក្យវិមានក្រឹមឡាំង លោក Dmitry Peskov បាននិយាយថា រុស្ស៊ីនឹងផ្អាកការវាយប្រហារលើរដ្ឋធានីអ៊ុយក្រែន រហូតដល់ថ្ងៃទី១ ខែកុម្ភៈ ដើម្បីជួយបង្កើតលក្ខខណ្ឌអំណោយផលសម្រាប់កិច្ចចរចាសន្តិភាព៕