ក្រុមជំនួយមនុស្សធម៌របស់អង្គការសហប្រជាជាតិ បាននិយាយកាលពីថ្ងៃអង្គារថា អរិភាពនៅប្រទេសស៊ូដង់ និងស៊ូដង់ខាងត្បូង បានធ្វើឲ្យមនុស្សរាប់ម៉ឺននាក់ផ្លាស់ទីលំនៅ។

ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បាននិយាយថា៖ «ភាពអសន្តិសុខជាបន្តបន្ទាប់នៅក្នុងតំបន់ជាច្រើន កំពុងជំរុញឲ្យមនុស្សកាន់តែច្រើនភៀសខ្លួន និងធ្វើឲ្យ ស្ថានការណ៍មនុស្សធម៌ដ៏ធ្ងន់ធ្ងររួចទៅហើយ កាន់តែធ្ងន់ធ្ងរឡើង»។

ការិយាល័យនេះ បានបញ្ជាក់ថា នៅក្នុងរដ្ឋ Kordofanខាងត្បូងរបស់ប្រទេសស៊ូដង់ បេសកកម្មរបស់ OCHA ទៅកាន់តំបន់ Abu Jubaihah កាលពីសប្តាហ៍មុន បានរកឃើញថា មានមនុស្សជាង ១០.000 នាក់ ដែលរស់នៅក្នុងជំរំ កំពុងប្រឈមនឹងការខ្វះខាតយ៉ាងខ្លាំងនូវអាហារ ការថែទាំសុខភាព ទឹក និង អនាម័យ ជម្រក និងសេវាអប់រំ។

OCHA បាននិយាយថា គ្រួសារដែលទើបផ្លាស់ទីលំនៅថ្មីភាគច្រើន បានភៀសខ្លួនចេញពីភាពអសន្តិសុខ និងភាពអត់ឃ្លាន នៅក្នុងរដ្ឋធានី Kadugli និងនៅក្នុងទីក្រុង Dilling។ អ្នកផ្សេងទៀតមកពីរដ្ឋ Kordofan ខាងលិច និងរដ្ឋ Darfur ខាងកើត និងខ្លះទៀតឆ្លងកាត់ស៊ូដង់ខាងត្បូង បន្ទាប់ពីការធ្វើដំណើរយ៉ាងវែងឆ្ងាយ និងដ៏គ្រោះថ្នាក់។

OCHA បានបន្ថែមថា ដៃគូរបស់ខ្លួន នៅរដ្ឋ Darfurខាងជើង បានរាយការណ៍ថា មនុស្សជាង ១.000នាក់ទើបតែមកដល់តំបន់ Tawila នាពេលថ្មីៗនេះ ហើយជាច្រើនគ្រួសារ កំពុងជួបប្រទះការខ្វះខាតស្បៀងអាហារ សេវាសុខភាព និងសម្ភារៈប្រើប្រាស់ក្នុងផ្ទះជាមូលដ្ឋាន៕