អគ្គលេខាធិការអង្គការណាតូ លោក Mark Rutte បាននិយាយថា កងកម្លាំងប្រដាប់អាវុធនៃអ្វីដែលហៅថា សម្ព័ន្ធភាពនៃឆន្ទៈ នឹងត្រូវបានដាក់ពង្រាយនៅអ៊ុយក្រែន ទាំងនៅលើដី លើសមុទ្រ និងនៅលើអាកាស នៅពេលដែលកិច្ចព្រមព្រៀងសន្តិភាពជាមួយរុស្ស៊ី ត្រូវបានសម្រេច។

ថ្លែងនៅក្នុងសភាអ៊ុយក្រែន លោកបានសង្កត់ធ្ងន់ថា ដរាបណារុស្ស៊ី និងអ៊ុយក្រែនចុះហត្ថលេខាលើកិច្ចព្រមព្រៀងសន្តិភាព សម្ព័ន្ធភាពនៃប្រទេសដែលមានឆន្ទៈ ដែលបានយល់ព្រមគាំទ្រទីក្រុងគីវ នឹងដាក់ពង្រាយកងកម្លាំងប្រដាប់អាវុធរបស់ពួកគេ ទៅកាន់អ៊ុយក្រែន បញ្ជូនយន្តហោះចម្បាំង និងផ្តល់ការគាំទ្រតាមសមុទ្រ។

ប្រមុខណាតូរូបនេះ បានបន្ថែមថា រដ្ឋជាសមាជិកផ្សេងទៀតរបស់អង្គការនេះ នឹងបន្តផ្តល់ជំនួយតាមវិធីផ្សេងទៀត។

ប្រទេសរុស្ស៊ីប្រឆាំងនឹងវត្តមានរបស់ទាហានណាតូ នៅអ៊ុយក្រែន។ នៅថ្ងៃទី ១៧ ខែធ្នូ ឆ្នាំ ២០២៥ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ជំហររបស់ទីក្រុងមូស្គូចំពោះការដាក់ពង្រាយកងទ័ពលោកខាងលិច នៅអ៊ុយក្រែន គឺមិនផ្លាស់ប្តូរ និងមានភាពច្បាស់លាស់។ នាពេលថ្មីៗនេះ រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ (Sergey Lavrov) បានកត់សម្គាល់ថា ការផ្តល់ការធានាសន្តិសុខដល់អ៊ុយក្រែនតាមរយៈ «អន្តរាគមន៍យោធាបរទេសលើផ្នែកខ្លះនៃទឹកដីអ៊ុយក្រែន» នឹងមិនអាចទទួលយកបានទេសម្រាប់រុស្ស៊ី៕