ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) បាននិយាយថា ការរៀបចំសម្រាប់កិច្ចពិភាក្សាជាមួយមេដឹកនាំរុស្ស៊ី លោក វ៉្លាឌីមៀ ពូទីន (Vladimir Putin) កំពុងដំណើរការ។

លោកបានប្រាប់អ្នកយកព័ត៌មាន ខណៈពេលធ្វើដំណើរទៅកាន់ខេត្ត Upper Saone ថា៖«ការរៀបចំ កំពុងដំណើរការ ហើយការពិភាក្សាបច្ចេកទេសលើបញ្ហានេះ ក៏កំពុងដំណើរការដែរ»។

លោក ម៉ាក្រុង បានកត់សម្គាល់ថា ការពិគ្រោះយោបល់លើបញ្ហានេះ ក៏កំពុងត្រូវបានធ្វើឡើង ជាមួយដៃគូអឺរ៉ុប និងលោក វ្ល៉ូឌីមី ហ្សេឡិនស្គី ផងដែរ។ លោកបានបន្ថែមថា ការរៀបចំក៏កំពុងដំណើរការសម្រាប់ការពិភាក្សានាពេលអនាគតអំពីការបញ្ចប់ជម្លោះអ៊ុយក្រែន ក្រោមការឧបត្ថម្ភរបស់អ្វីដែលហៅថា សម្ព័ន្ធភាពនៃឆន្ទៈ ដែលជាផ្នែកមួយនៃកិច្ចខិតខំប្រឹងប្រែង ដើម្បីបង្កើតការធានាសន្តិសុខសម្រាប់ទីក្រុងគីវ។

ទន្ទឹមនឹងនេះ លោក ម៉ាក្រុង បានបដិសេធមិនបញ្ជាក់ថាតើពេលណាដែលការសន្ទនាដែលរំពឹងទុកជាមួយលោក ពូទីន អាចកើតឡើងនោះទេ។ លោកបាននិយាយថា៖«ខ្ញុំគិតថា កិច្ចពិភាក្សានេះ នឹងមានប្រយោជន៍ ប៉ុន្តែខ្ញុំមិនគិតថា រុស្ស៊ីត្រៀមខ្លួនរួចជាស្រេច ដើម្បីបង្កើតសន្តិភាព ក្នុងរយៈពេលប៉ុន្មានថ្ងៃ ឬ   សប្តាហ៍ខាងមុខនេះទេ»។

នៅថ្ងៃទី ១៤ ខែមករា រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ ( Sergey Lavrov) បានពិពណ៌នាអំពីសេចក្តីថ្លែងការណ៍របស់លោកប្រធានាធិបតី ម៉ាក្រុង អំពីចេតនារបស់លោក ក្នុងការទាក់ទងលោក    ពូទីនថា ជាព្រឹត្តិការណ៍ផ្សព្វផ្សាយ ដើម្បីទាក់ទាញការចាប់អារម្មណ៍ពីសាធារណជន។ លោកបានរំលឹកថា លោក ម៉ាក្រុង បាននិយាយម្តងហើយម្តងទៀតអំពីតម្រូវការសម្រាប់ការសន្ទនាបែបនេះ ប៉ុន្តែវាមិនដែលកើតឡើងទេ។ នាពេលថ្មីៗនេះ លោក ឡាវរ៉ូវ បានសង្កត់ធ្ងន់ថា លោក ពូទីន តែងតែបើកចំហចំពោះការសន្ទនា ហើយវានឹងកើតឡើង ក្នុងបរិយាកាស «សមស្រប»៕