រដ្ឋាភិបាលសហរដ្ឋអាមេរិកកំពុងធ្វើការ ដើម្បីចេញអាជ្ញាប័ណ្ណទូទៅដែលអនុញ្ញាតឲ្យក្រុមហ៊ុនផលិតប្រេង និងឧស្ម័ន នៅក្នុងប្រទេសវ៉េណេស៊ុយអេឡា នៅដើមសប្តាហ៍នេះ ខណៈដែលទីក្រុងវ៉ាស៊ីនតោន កំពុងប្រឹងប្រែងជំរុញដល់ការពង្រីកផលិតកម្ម នៅក្នុងប្រទេសមាជិកអង្គការ OPEC មួយនេះ ចាប់តាំងពីមានព្រឹត្តិការណ៍ចាប់ខ្លួនប្រធានាធិបតី។ នេះបើយោងតាមប្រភពចំនួន ៣ ដែលស្និទ្ធនឹងបញ្ហានេះ បាននិយាយប្រាប់សារព័ត៌មាន Reuters។

ប្រភពព័ត៌មានបាននិយាយថា ចំណាត់ការរបស់ការិយាល័យគ្រប់គ្រងទ្រព្យសម្បត្តិបរទេស (OFAC) របស់ក្រសួងរតនាគារ នឹងអនុញ្ញាតឲ្យក្រុមហ៊ុននានារុករក និងបូមប្រេងឆៅ និងឧស្ម័នធម្មជាតិ។ OFAC បានអនុញ្ញាតឲ្យក្រុមហ៊ុនអាមេរិកលក់ ស្តុក និងចម្រាញ់ប្រេងរបស់វ៉េណេស៊ុយអេឡារួចហើយ នៅក្នុងអាជ្ញាប័ណ្ណទូទៅដំបូងដែលចេញក្នុងខែមករា ហើយនៅថ្ងៃទី៣ ខែកុម្ភៈ ក៏បានចេញអាជ្ញាប័ណ្ណដាច់ដោយឡែកមួយ ដែលអនុញ្ញាតឲ្យលក់សារធាតុពង្រាវរបស់សហរដ្ឋអាមេរិកដែលត្រូវការ ដើម្បីកែច្នៃប្រភេទប្រេងឆៅរបស់វ៉េណេស៊ុយអេឡាឲ្យទៅជាប្រេងដែលអាចនាំចេញបាន។

នៅពេលត្រូវបានសួរអំពីផែនការផ្ដល់អាជ្ញាប័ណ្ណនេះ អ្នកនាំពាក្យសេតវិមាន លោកស្រី Taylor Rogers បាននិយាយថា «ក្រុមរបស់ប្រធានាធិបតី កំពុងធ្វើការយ៉ាងសស្រាក់សស្រាំ ដើម្បីធានាឲ្យបានថា ក្រុមហ៊ុនប្រេងអាចធ្វើការវិនិយោគលើហេដ្ឋារចនាសម្ព័ន្ធប្រេងរបស់ប្រទេសវ៉េណេស៊ុយអេឡា។ ព័ត៌មានលម្អិតនឹងមានផ្ដល់ជូននៅពេលក្រោយ»។

គួរបញ្ជាក់ថា លោក Trump បានលើកឡើងថា សហរដ្ឋអាមេរិកមានបំណងគ្រប់គ្រងការលក់ប្រេង និងប្រាក់ចំណូលរបស់វ៉េណេស៊ុយអេឡាដោយគ្មានកំណត់ ចាប់តាំងពីកងកម្លាំងអាមេរិក បានចាប់ខ្លួនលោក Nicolas Maduro អំឡុងការវាយឆ្មក់មួយ នៅទីក្រុងការ៉ាកាស កាលពីថ្ងៃទី៣ ខែមករា៕