វិមាន Downing Street កាលពីថ្ងៃអង្គការ (ទី៣ ខែកុម្ភៈ ឆ្នាំ២០២៦) បានឲ្យដឹងថា នាយករដ្ឋមន្ត្រីអង់គ្លេស លោក Keir Starmer និងប្រធានាធិបតីអាមេរិក លោក Donald Trump បានទទួលស្គាល់ពី «សារៈសំខាន់ជាយុទ្ធសាស្ត្រ» នៃមូលដ្ឋានទ័ពអាកាសសហរដ្ឋអាមេរិក-ចក្រភពអង់គ្លេស នៅក្នុងប្រជុំកោះ Chagos ហើយនឹងធ្វើការយ៉ាងជិតស្និទ្ធ ដើម្បីធានាប្រតិបត្តិការរបស់វា។

កាលពីខែមករា លោក Trump បានរិះគន់កិច្ចព្រមព្រៀងឆ្នាំ២០២៥ របស់ចក្រភពអង់គ្លេស ដើម្បីប្រគល់អធិបតេយ្យភាពនៃប្រជុំកោះនេះឲ្យទៅម៉ូរីស ក្នុងនោះរួមទាំងកោះ Diego Garcia ដែលមានមូលដ្ឋានទ័ពរបស់ប្រទេសទាំង២ ផងដែរ ដោយចាត់ទុកថា ជាទង្វើនៃ «ភាពទន់ខ្សោយទាំងស្រុង» និង «ការមិនគិតគូរឲ្យបានដិតដល់សោះ»។

វិមាន Downing Street បានឲ្យដឹងនៅក្នុងសេចក្តីថ្លែងការណ៍មួយថា លោក Trump និងលោក Starmer បាននិយាយកាលពីថ្ងៃទី៣ ខែកុម្ភៈ ដោយបានយល់ស្របគ្នាថា រដ្ឋាភិបាលរបស់ពួកលោក នឹងបន្តធ្វើការយ៉ាងជិតស្និទ្ធ ដើម្បីធានាប្រតិបត្តិការនាពេលអនាគតរបស់មូលដ្ឋាននេះ ហើយនឹងលើកឡើងម្តងទៀតក្នុងពេលឆាប់ៗនេះ។

គួរបញ្ជាក់ថា លោក Starmer មកពីគណបក្សការងារ បានបង្កើតទំនាក់ទំនងដ៏រឹងមាំ ជាមួយលោក Trump មកពីគណបក្សសាធារណរដ្ឋ ដោយបានក្លាយជាមេដឹកនាំដំបូងគេដែលធានាបាននូវកិច្ចព្រមព្រៀងបន្ថយអត្រាពន្ធមួយចំនួន ប៉ុន្តែវាត្រូវបានរង្គោះរង្គើដោយការមិនចុះសម្រុងគ្នា ជុំវិញមហិច្ឆតារបស់លោក Trump ក្នុងការទិញកោះ Greenland និងភាពចម្រូងចម្រាស ពាក់ព័ន្ធនឹងប្រជុំកោះ Chagos៕