លោក Igor Yushkov គឺជាសាស្រ្តាចារ្យនៅសាកលវិទ្យាល័យហិរញ្ញវត្ថុស្ថិតក្រោមការគ្រប់គ្រងរបស់រដ្ឋាភិបាលសហព័ន្ធរុស្ស៊ី និយាយប្រាប់ទីភ្នាក់ងារព័ត៌មានរ៉យទ័រថា ឥណ្ឌាទំនងជាមិនបញ្ឈប់ការទិញប្រេងឆៅរុស្ស៊ីនោះទេ បើទោះបីជាមានសេចក្តីអត្ថាធិប្បាយរបស់ប្រធានាធិបតីសហរដ្ឋអាមេរិកលោក Donald Trump ។

លោក Yushkov និយាយថា កិច្ចព្រមព្រៀងបច្ចុប្បន្នរវាងរុស្ស៊ី និងឥណ្ឌា ពាក់ព័ន្ធនឹងការបញ្ចុះតម្លៃសម្រាប់ប្រេងឆៅរុស្ស៊ី ដែលឥណ្ឌាចម្រាញ់ និងលក់នៅក្នុងតម្លៃទីផ្សារ ដូច្នេះហើយឥណ្ឌា អាចនឹងបិទបាំងទំហំប្រេងដែលពួកគេទិញពីរុស្ស៊ី ។

គួរឲ្យដឹងថា លោក Trump បានប្រកាសកិច្ចព្រមព្រៀងនៅលើព័ត៌មានសង្គម ក្រោយការទូរស័ព្ទជាមួយនាយករដ្ឋមន្រ្តីឥណ្ឌាលោក Narendra Modi ដោយរូបលោកនិយាយថា ឥណ្ឌាបានយល់ព្រមឈប់ទិញប្រេងរុស្ស៊ី ហើយនិងបន្ទាបរបាំងពាណិជ្ជកម្មលើការនាំចេញសហរដ្ឋអាមេរិក ។

ស្របពេលដែលសេចក្តីប្រកាសរបស់លោក Trump ខ្វះព័ត៌មានជាក់លាក់ មន្រ្តីមួយរូបរបស់រដ្ឋាភិបាលឥណ្ឌា និយាយថា ឥណ្ឌាយល់ព្រមទិញប្រេង ទំនិញការពារជាតិ និងយន្តហោះពីសហរដ្ឋអាមេរិក ខណៈដែលបើកដោយអន្លើរនូវវិស័យកសិកម្មត្រូវបានការពាររបស់ខ្លួន ។

ដោយឡែក អ្នកនាំពាក្យវិមានក្រឹមឡាំងលោក Dmitry Peskov បាននិយាយកាលពីព្រឹកថ្ងៃអង្គារថា ខ្លួនពុំបានឮសេចក្តីថ្លែងការណ៍ណាមួយពីឥណ្ឌា ជុំវិញការឈប់ទិញប្រេងរុស្ស៊ីនោះទេ ហើយទីក្រុងមូស្គូ មានបំណងអភិវឌ្ឍភាពជាដៃគូយុទ្ធសាស្រ្តជាមួយទីក្រុងញូវដែលី ។

លោក Peskov និយាយថា រុស្ស៊ីឲ្យតម្លៃទំនាក់ទំនងរបស់ខ្លួនជាមួយឥណ្ឌា ហើយនិងបន្តអភិវឌ្ឍភាពជាដៃគូយុទ្ធសាស្រ្តរបស់ខ្លួន ។

លោកបន្តថា ជាការពិតណាស់ថា ពួកយើងនៅបន្តតាមដានព័ត៌មានទាំងអស់លើវិធានបទមួយនេះឲ្យបានដិតដល់បំផុត ។ ពិតណាស់ថា ពួកយើងចាប់អារម្មណ៍លើសេចក្តីថ្លែងការណ៍របស់លោកប្រធានាធិបតី Trump ។ ពួកយើងកត់ចំណាំវា និងវិភាគវាដោយការប្រុងប្រយ័ត្ន ។

លោកនិយាយទៀតថា ពួកយើងគោរពច្រើននូវទំនាក់ទំនងទ្វេភាគីសហរដ្ឋអាមេរិក-ឥណ្ឌា ហើយអ្វីដែលពួកយើងឲ្យតម្លៃច្រើនជាងនេះ គឺភាពជាដៃគូយុទ្ធសាស្រ្តដ៏ជឿនលឿនរបស់ពួកយើងជាមួយឥណ្ឌា ។ នេះគឺជារឿងសំខាន់សម្រាប់ពួកយើង ហើយពួកយើងចង់បន្តអភិវឌ្ឍបន្ថែមទៀត ទំនាក់ទំនងទ្វេភាគីជាមួយទីក្រុងញូវដែលី ៕