ប្រធានាធិបតីម៉ិកស៊ិកលោកស្រី Claudia Sheinbaum និយាយកាលពីថ្ងៃអង្គារថា រដ្ឋាភិបាលរបស់លោកស្រីមានគម្រោងបញ្ជូនការដឹកជញ្ជូនជំនួយមនុស្សធម៌ដល់គុយបាក្នុងសប្តាហ៍នេះ ដោយលោកស្រីធ្វើការសង្កត់ធ្ងន់ថា កញ្ចប់ជំនួយនឹងផ្អែកលើតម្រូវការរដ្ឋរបស់ទីក្រុងឡាហាវ៉ាន់ ហើយនិងមិនបញ្ចេញជាសាធារណៈនោះទេ ។

រដ្ឋបាលរបស់លោកស្រី បាននិយាយកាលពីថ្ងៃអាទិត្យថា ពួកគេនឹងស្វែងរកការដឹកជញ្ជូនប្រេងទៅកាន់ប្រទេសគុយបា សម្រាប់ហេតុផលមនុស្សធម៌ ដោយពុំបានស្វែងរកការប្រឈមដាក់គ្នានោះទេ ដែលជំនួយទាំងនេះ នឹងរួមមានផលិតផ្សេងទៀត ក្នុងរយៈពេល ១សប្តាហ៍ទៀតនេះ ។

គួរឲ្យដឹងថា ម៉ិកស៊ិក គឺជាប្រទេសផ្គត់ផ្គង់ប្រេងធំជាងគេបំផុតតែមួយគត់របស់គុយបា ហើយកោះមួយនេះ បានប្រឈមនឹងកង្វះខាតប្រេងធ្ងន់ធ្ងរដែលរួមចំណែកដល់កង្វះខាតការផលិតថាមពល ការដាច់ចន្តអគ្គិសនីទ្រង់ទ្រាយធំ និងការអាក់ខានសេដ្ឋកិច្ចទូលំទូលាយ ។

ការដឹកជញ្ជូនគ្រោងទុកនេះ បានកើតមានឡើង ស្របពេលភាពតានតឹងកើនឡើងរវាងទីក្រុងឡាហាវ៉ាន់ និងទីក្រុងវ៉ាស៊ីនតោន ក្រោយការចាប់ខ្លួនមេដឹកនាំវេណេស៊ុយអេឡាលោក Nicolas Maduroពីសំណាក់សហរដ្ឋអាមេរិក កាលពីខែមុន ដែលជាសម្ព័ន្ធមិត្តជិតស្និតរបស់គុយបា ។

ប្រធានាធិបតីសហរដ្ឋអាមេរិកលោក Donald Trump បានចាត់ទុកគុយបាថា ជាការគំរាមកំហែងមិនធម្មតាចំពោះសន្តិសុខជាតិអាមេរិក ហើយលោកបានគំរាមដំឡើងពន្ធលើការនាំចេញទៅកាន់សហរដ្ឋអាមេរិករបស់ប្រទេសណាមួយដែលបញ្ជូនប្រេងទៅកាន់ប្រទេសកោះគ្រប់គ្រងបែបលទ្ធិកុម្មុយនិស្តមួយនេះ ៕