កងទ័ពស៊ូដង់ និយាយថា កាលពីថ្ងៃអង្គារ ពួកគេបានបំបែកការឡោមព័ទ្ធរយៈពេល ១ឆ្នាំ នៅទីក្រុង Kadugli ធ្វើឲ្យប្រជាពលរដ្ឋរាប់ម៉ឺននាក់ រួចផុតពីគ្រោះទុរ្ភិក្ស និងផ្តល់សញ្ញាថ្មីនៃការផ្លាស់ប្តូរសន្ទុះសង្រ្គាម ។

ជម្លោះរវាងកងទ័ពស៊ូដង់ និងកងកម្លាំងគាំទ្ររហ័ស(RSF) បានធ្វើឲ្យមនុស្សរាប់លាននាក់ ជម្លៀសខ្លួន និងបណ្តាលឲ្យមានវិបត្តិមនុស្សធម៌ទ្រង់ទ្រាយធំ ចាប់តាំងពីវាបានផ្ទុះឡើងកាលពីខែមេសា ឆ្នាំ ២០២៣ ។

 តំបន់ជួរមុខចុងក្រោយនៃសង្រ្គាមមួយនេះ គឺតំបន់ Kordofan ដែលកងកម្លាំង RSF ចាប់ផ្តើមបោសសម្អាត ក្រោយរដូវវស្សាបញ្ចប់ទៅកាលពីចុងឆ្នាំមុន ។ កងកម្លាំង RSFពុំបានឆ្លើយតបភ្លាមៗនោះទេចំពោះសំណើសុំសេចក្តីអត្ថាធិប្បាយ ។

 លោក Jan Egeland គឺជាប្រធានក្រុមប្រឹក្សាជនភៀសខ្លួនន័រវែស និយាយថា លោកបានមើលឃើញការរងគ្រោះទ្រង់ទ្រាយធំ នៅក្នុងចំណោមអ្នកដែលបានរត់ភៀសខ្លួនចេញពីទីក្រុង Kadugli ទៅកាន់ជំរុំ ស្ថិតក្នុងដែនដីរបស់ចលនារំដោះប្រជាជនស៊ូដង់-ភាគខាងជើង(SPLM-N) ។

 សូមបញ្ជាក់ថា ទីក្រុង Kadugli និងទីក្រុងក្បែរគ្នា al-Dalanj ស្ថិតក្រោមការឡោមព័ទ្ធចាប់តាំងពី សង្រ្គាមចាប់ផ្តើមមកម្ល៉េះ ។ 

មាននូវការប្រយុទ្ធគ្នាកើនឡើង ក្រោយចលនា SPLM-N ដែលគ្រប់គ្រងដែនដីក្នុងរដ្ឋ និងកន្លែងផ្សេងទៀត បានចូលរួមកម្លាំងជាមួយកងកម្លាំង RSF កាលពីឆ្នាំមុន ៕