រូបភាពវីដេអូឃ្លីបបញ្ចេញដោយអង្គភាពយោធាសង្រ្គោះបន្ទាន់អេស្ប៉ាញនៅថ្ងៃពុធនេះ ឃើញសមាជិកសេវាកម្មធ្វើការងារ ដើម្បីបញ្ចៀសផុតផលខូចខាតនៅតំបន់ភាគខាងត្បូងប្រទេសអេស្ប៉ាញ ស្របពេលដែលព្យុះ Leo វាយប្រហារឧបទ្វីបអ៊ីបេរី ។

កាលពីយប់ថ្ងៃអង្គារ ក្រុមអាជ្ញាធរនៅតំបន់ Andalusia បានជម្លៀសមនុស្ស ៣ពាន់នាក់ ចេញពីតំបន់ងាយរងការជន់លិច ជាវិធានការប្រុងប្រយ័ត្នទុកជាមុន ។

សាលារៀនត្រូវបានផ្អាកការសិក្សានៅទូទាំងតំបន់ ហើយក្រុមអាជ្ញាធរបានជំរុញឲ្យអ្នកស្រុក ជៀសវាងការធ្វើដំណើរពុំចាំបាច់ ។

អាជ្ញាធរឧតុនិយមអេស្ប៉ាញ បានព្រមានពីភ្លៀងធ្លាក់ខ្លាំង នៅទូទាំងតំបន់ភាគខាងត្បូងប្រទេស ។ ពួកគេអះអាងថា នៅតំបន់ភ្នំ Grazalema ភ្លៀងធ្លាក់អាចនឹងមានកម្ពស់រហូតដល់ ២០០-២៥០មីលីម៉ែត្រ ក្នុងរយៈពេល ២៤ម៉ោង ។

ខណៈពេលនោះដែរ ក្រុមមន្រ្តីបានចេញសេចក្តីជូនដំណឹងគ្រាអាសន្នសម្រាប់ហានិភ័យទឹកជំនន់ធ្ងន់ធ្ងរ ដោយសារទឹកទន្លេឡើងខ្លាំង ។

សូមបញ្ជាក់ថា ឧបទ្វីបអ៊ីបេរី បានជួបប្រទេសភ្លៀងផ្គររន្ទះ ព្រិលធ្លាក់ និងសន្ទុះខ្យល់បក់ខ្លាំង ក្នុងរយៈពេលប៉ុន្មានខែចុងក្រោយនេះ ក្នុងនោះ តំបន់ភាគខាងត្បូងអេស្ប៉ាញ បានប្រឈមអ្វីដែលអ្នកស្រុកនិយាយថា គឺជារដូវរងាសើមបំផុត ក្នុងរយៈពេល ៤០ឆ្នាំ ៕