មន្រ្តីអាកាសចរណ៍មួយរូបនិយាយកាលពីថ្ងៃអង្គារថា ក្រុមហ៊ុនអាកាសចរណ៍អេត្យូពី បានចាប់ផ្តើមឡើងវិញហើយជើងហោះហើរទៅកាន់តំបន់ភាគខាងជើងទីក្រេ ក្រោយផ្អាកអស់រយៈពេលជាច្រើនថ្ងៃ បង្កឡើងដោយសារការប៉ះទង្គិចគ្នារវាងកងកម្លាំងក្នុងតំបន់ និងកងទ័ពជាតិអេត្យូពី ។

សេវាកម្មត្រូវបានផ្អាកកាលពីចុងសប្តាហ៍មុន ក្រោយសេចក្តីរាយការណ៍ពីការប្រយុទ្ធគ្នាក្នុងតំបន់ជម្លោះភាគខាងលិចតំបន់ទីក្រេ ធ្វើឲ្យមានការព្រួយបារម្ភពីអស្ថិរភាពកើតឡើងថ្មីនៅក្នុងតំបន់នោះ ដែលទើបងើបពីសង្រ្គាមរយៈពេល ២ឆ្នាំ រវាងរដ្ឋាភិបាលសហព័ន្ធ និងកងកម្លាំងទីក្រេ ដែលបានបញ្ចប់ទៅកាលពីចុងឆ្នាំ ២០២២ ។

នៅអាកាសយានដ្ឋានអន្តរជាតិ Mekelle’s Alula Aba Nega ក្រុមអ្នកដំណើរនិយាយថា ការលុបចោលជើងហោះហើរ បានធ្វើឲ្យអាក់ខានកាលបរិច្ឆេតធ្វើដំណើររបស់ពួកគេ ក៏ដូចជាបង្កើនការចំណាយរបស់ពួកគេ ។

លោក Solomon Areaya ដែលបានជាប់ខ្លួនអស់រយៈពេល ២ថ្ងៃមកហើយនោះ និយាយថា លោកសប្បាយចិត្តខ្លាំង នៅពេលចុងក្រោយលោកអាចធ្វើដំណើរវិញបាន ។

លោកបន្តថា ជាងនេះទៅទៀត ស្ថានភាពបែបនេះ បានធ្វើមនុស្សមានការភ្ញាក់ផ្អើលនៅទូទាំងប្រទេស ហើយកាលបរិច្ឆេតធ្វើដំណើររបស់លោកត្រូវបានអាក់ខាន ២-៣ថ្ងៃមកហើយ ប៉ុន្តែនៅពេលនេះ លោកសប្បាយចិត្តនៅពេលដែលសេវាកម្មហោះហើរ បានចាប់ផ្តើមឡើងវិញ ។

លោក Berhane Gebrehiwet គឺជាអ្នកដំណើរម្នាក់ទៀត និយាយដែរថា លោកប្រឈមនឹងការចំណាយថ្លៃស្នាក់នៅមិននឹកស្មានដល់ ក្រោយជើងហោះហើរទៅផ្ទះវិញ ត្រូវបានលុបចោល ។

លោកបន្តថា លោកសង្ឃឹមថា ជើងហោះហើរនឹងចាប់ផ្តើមឡើងវិញក្នុងពេលដ៏ខ្លីខាងមុខនេះ ប៉ុន្តែការលុកចោលបានបន្តអស់រយៈពេលជាច្រើនថ្ងៃមកហើយ ។ 

សូមបញ្ជាក់ថា ជម្លោះតំបន់ទីក្រេ ដែលបានសម្លាប់មនុស្សរាប់ម៉ឺននាក់ បង្កភាពអត់ឃ្លាន និងការដួលរលំនៃសេវាកម្មចាំបាច់នោះ បានបញ្ចប់ទៅជាផ្លូវការជាមួយកិច្ចព្រមព្រៀងសន្តិភាពកាលពីខែវិច្ឆិកា ឆ្នាំ ២០២២ ៕