ស្រ្តីប៉ាឡេស្ទីន បាននិយាយរៀបរាប់ពីដំណើរដ៏ភ័យរន្ធត់ ពេលដែលពួកគេឆ្លងកាត់ច្រកព្រំដែន Rafah តាមផ្លូវទៅកាន់ផ្ទះរបស់ពួកគេនៅតំបន់ហ្កាហ្សា ចេញពីប្រទេសអេហ្ស៊ីប ក្នុងនោះមនុស្សដែលត្រូវបានអនុញ្ញាតឲ្យចូលដែនដីញាំញីដោយសារសង្រ្គាមមួយនេះ ត្រូវបានបំបែកចេញពីកូនៗរបស់ពួកគេ ដាក់ខ្នោះដៃ ចងមុខ និងសួរចម្លើយ ក្រោមការគំរាមកំហែងអស់រយៈពេលជាច្រើនម៉ោង ។

លោក Ibrahim Al Khalili គឺជាអ្នកសារព័ត៌មានរបស់កាសែត Al Jazeera រាយការណ៍ពីទីក្រុង Khan Younis ស្ថិតនៅភាគខាងត្បូងតំបន់ហ្កាហ្សាថា សម្រាប់ស្រ្តីប៉ាឡេស្ទីន ១២នាក់ និងកូនៗរបស់ពួកគេ ត្រូវបានអនុញ្ញាតឲ្យចូលតំបន់ហ្កាហ្សា ឆ្លងកាត់ច្រកព្រំដែន Rafah កាលពីថ្ងៃចន្ទ ដំណើរវិលត្រឡប់មកផ្ទះវិញ មានរយៈពេលយូរ និងអស់កម្លាំងខ្លាំង ជាមួយនឹងការរង់ចាំ ការភ័យខ្លាច និងភាពពុំច្បាស់លាស់ ។

លោក Al Khalili និយាយថា ជនឡេស្ទីនដែលត្រូវវិលត្រឡប់មកវិញ ក្លាយជាកម្មវត្ថុនៃនីតិវិធីសន្តិសុខដ៏តឹងរ៉ឹងដោយកងកម្លាំងអ៊ីស្រាអែល ដែលគ្រប់គ្រងច្រកព្រំដែន Rafah ដើម្បីកំណត់ពេល និងថាតើជនប៉ាឡេស្ទីននឹងត្រូវអនុញ្ញាតឲ្យវិលត្រឡប់ទៅកាន់ផ្ទះរបស់ពួកគេវិញឬយ៉ាងណានៅតំបន់ហ្កាហ្សា ។ 

ស្រ្តីប៉ាឡេស្ទីនម្នាក់ដែលបានវិលត្រឡប់មកកាន់តំបន់ហ្កាហ្សាវិញ និយាយថា ពួកគេបានយកអ្វីៗទាំងអស់ពីពួកយើង ។ ចំណីអាហារ ភេសជ្ជៈ ទុកតែកាបូបមួយឲ្យពួកយើងប៉ុណ្ណោះ ។

ស្រ្តីម្នាក់នេះ និយាយថា កងទ័ពអ៊ីស្រាអែលហៅម្តាយខ្ញុំមុន ហើយនាំគាត់យកទៅ ។ បន្ទាប់មកពួកគេហៅខ្ញុំ ហើយក៏នាំខ្ញុំយកទៅ ។ ពួកគេបិទមុខខ្ញុំ ពួកគេបានសួរចម្លើយខ្ញុំនៅក្នុងតង់ សួរថាតើហេតុអ្វីបានជាខ្ញុំចង់វិលត្រឡប់ទៅកាន់តំបន់ហ្កាហ្សា ហើយខ្ញុំនិយាយប្រាប់ពួកគេថា ខ្ញុំចង់ជួបកូនៗរបស់ខ្ញុំ និងចង់ទៅកាន់ប្រទេសរបស់ខ្ញុំវិញ ។ ពួកគេបានព្យាយាមដាក់សម្ពាធខាងផ្លូវចិត្តមកលើខ្ញុំ និងចង់ឲ្យខ្ញុំបែកបាក់ជាមួយកូនៗរបស់ខ្ញុំ និងបង្ខំខ្ញុំឲ្យនិរទេសខ្លួន ៕