អ្នកចរចារបស់ប្រទេសអ៊ុយក្រែន និងរុស្ស៊ី បានចាប់ផ្តើមកិច្ចចរចាជុំទី២ ដែលសម្របសម្រួលដោយសហរដ្ឋអាមេរិក នៅទីក្រុង Abu Dhabi ប្រទេសអេមីរ៉ាតអារ៉ាប់រួម នៅថ្ងៃពុធ (ទី៤ ខែកុម្ភៈ ទី២០២៦) នេះ ដោយព្យាយាមជំរុញដល់កិច្ចប្រឹងប្រែង ដើម្បីបញ្ចប់ជម្លោះដ៏ធំបំផុតរបស់អឺរ៉ុប គិតចាប់តាំងពីសង្គ្រាមលោកលើកទី២។

កិច្ចប្រជុំត្រីភាគីរយៈពេល ២ថ្ងៃ បានកើតឡើងបន្ទាប់ពីប្រធានាធិបតីអ៊ុយក្រែន លោក Volodymyr Zelenskiy បាននិយាយថា រុស្ស៊ីបានកេងចំណេញពីបទឈប់បាញ់ថាមពលដែលគាំទ្រដោយសហរដ្ឋអាមេរិក កាលពីសប្តាហ៍មុន ដើម្បីស្តុកគ្រាប់រំសេវ ដោយបានវាយប្រហារអ៊ុយក្រែន ជាមួយនឹងមីស៊ីលបាលីស្ទិក ក្នុងចំនួនដ៏ច្រើនបំផុត កាលពីថ្ងៃអង្គារ។

អ្នកចរចាជាន់ខ្ពស់របស់អ៊ុយក្រែន លោក Rustem Umerov បានឲ្យដឹងនៅលើកម្មវិធីផ្ញើសារ Telegram ថា៖ «ការចរចាជុំមួយទៀត បានចាប់ផ្តើមហើយ នៅទីក្រុង Abu Dhabi។ ដំណើរការចរចា បានចាប់ផ្តើមក្នុងទម្រង់ត្រីភាគី ដែលមានអ៊ុយក្រែន សហរដ្ឋអាមេរិក និងរុស្ស៊ី។

ជាមួយគ្នានេះ លោក Umerov បានបន្ថែមថា ក្រុមចរចាក៏នឹងជួបគ្នាជាក្រុមដាច់ដោយឡែកពីគ្នា ដើម្បីពិភាក្សាអំពីយន្តការចរចាជាក់លាក់ ហើយបន្ទាប់មកនឹងបន្តដោយកិច្ចប្រជុំរួមគ្នា ដើម្បីធ្វើឲ្យជំហរត្រូវគ្នា៕

ក្នុងរយៈពេលមួយឆ្នាំកន្លងមកនេះ រដ្ឋបាលរបស់ប្រធានាធិបតីអាមេរិក លោក Donald Trump បានជំរុញទាំងទីក្រុងគីវ និងមូស្គូ ឲ្យស្វែងរកការស្រុះស្រួលមួយ ដើម្បីបញ្ចប់ជម្លោះរយៈពេល ៤ឆ្នាំ ដែលបង្កឡើងដោយការឈ្លានពានរបស់រុស្ស៊ីលើអ៊ុយក្រែន ក្នុងឆ្នាំ២០២២ ប៉ុន្តែភាគីទាំង២ នៅតែមានគំនិតខ្វែងគ្នាយ៉ាងខ្លាំង ជុំវិញចំណុចសំខាន់ៗ ទោះបីជាបានធ្វើការចរចាជាច្រើនជុំជាមួយមន្ត្រីអាមេរិកក៏ដោយ៕