នគរបាលអ៊ុយក្រែន និងក្រុមស្ម័គ្រចិត្ត បានជម្លៀសអ្នកស្រុកចេញពីភូមិជួរមុខ Tavriiske និង Yurkivka ស្ថិតក្នុងតំបន់ Zaporizhzhia ស្របពេលស្ថានភាពសន្តិសុខកាន់តែធ្ងន់ធ្ងរទៅ ដោយសារការរុលចូលរបស់ទាហានរុស្ស៊ី ។

ក្រុមមន្រ្តីនិយាយថា មនុស្ស ២០នាក់ ត្រូវបាននាំចេញ រួមទាំងមនុស្សមួយគ្រួសារមានក្មេង ៥នាក់ ហើយនិងអ្នកស្រុកមានវ័យចំណាស់ជាច្រើននាក់ទៀត ។

ភូមិជាច្រើន ស្ថិតក្រោមការវាយប្រហារយ៉ាងខ្លាំងក្លាពីគ្រាប់បែកតម្រង់គោលដៅ ប្រព័ន្ធបាញ់រ៉ុក្កែតចម្រុះជើងទម្រ និងយានដ្រូន FPV ដែលពិបាកបាញ់ទម្លាក់ ។

អ្នកស្រី Maryna Vyshnevska ដែលជាម្តាយកូន ៥នាក់ និយាយថា គ្រួសាររបស់គាត់ បានសម្រេចចិត្តចាកចេញ ក្រោយការផ្លោងគ្រាប់កាំភ្លើងធំ បានបំផ្លិចបំផ្លាញផ្ទះ ៣ខ្នង និងដោយសារអ្នកស្រីព្រួយបារម្ភពីសុវត្ថិភាពកូនៗរបស់គាត់ ។

ក្រុមមន្រ្តីនិយាយថា បើទោះបីជាមានគ្រោះថ្នាក់បែបនេះក្តី មនុស្សចាស់មួយចំនួន បន្តស្នាក់នៅក្នុងភូមិ Tavriiske និងភូមិ Yurkivka ។

សូមបញ្ជាក់ថា ភូមិ Tavriiske ស្ថិតនៅចម្ងាយប្រហែល ១៤គ.ម ពីតំបន់ប្រផេះ គឺជាតំបន់បែងចែកទីតាំងឈរជើងរបស់ទាហានអ៊ុយក្រែន និងទាហានរុស្ស៊ី ៕