លោកប្រធានាធិបតីចិន ស៊ី ជីនពីង (Xi Jinping) និងលោកប្រធានាធិបតីរុស្ស៊ី វ្ល៉ាឌីមៀរ ពូទីន (Vladimir Putin) បានសាទរចំណងទាក់ទងរបស់ប្រទេសទាំង២ ក្នុងអំឡុងពេលជជែកតាមទូរស័ព្ទឃើញរូប (វីដេអូខល) នៅថ្ងៃពុធ (ទី៤ ខែកុម្ភៈ ឆ្នាំ២០២៦) នេះ ដែលជាការធ្វើឡើងក្នុងឱកាសខួបលើកទី ៤ នៃសង្គ្រាមរបស់ទីក្រុងមូស្គូ នៅអ៊ុយក្រែន។

នៅក្នុងការផ្សាយតាមទូរទស្សន៍រដ្ឋរុស្ស៊ី អំពីកិច្ចពិភាក្សានេះ លោក ពូទីន បានលើកឡើងថា ទំនាក់ទំនងទីក្រុងមូស្គូ-ប៉េកាំង គឺជាកត្តាស្ថិរភាពដ៏សំខាន់មួយ នៅពេលដែលភាពចលាចលទូទាំងសកលលោកមានសភាពកាន់តែខ្លាំងឡើង។ ចំណែកលោក ស៊ី ដែលបាននិយាយតាមរយៈអ្នកបកប្រែ បានអំពាវនាវឲ្យប្រទេសទាំង២ រៀបចំ «ផែនការដ៏ធំអស្ចារ្យ» ដើម្បីជំរុញទំនាក់ទំនងទ្វេភាគី ដែលលោកបានបញ្ជាក់ថា កំពុងមានវឌ្ឍនភាពក្នុងទិសដៅដ៏ត្រឹមត្រូវ។

គួរបញ្ជាក់ថា ប្រទេសចិន និងរុស្ស៊ីបានប្រកាសពីភាពជាដៃគូយុទ្ធសាស្ត្រ «គ្មានដែនកំណត់» ត្រឹមតែប៉ុន្មានថ្ងៃមុនពេលលោក ពូទីន បានបញ្ជូនកងទ័ពរាប់ម៉ឺននាក់ចូលទៅក្នុងប្រទេសអ៊ុយក្រែន កាលពីខែកុម្ភៈ ឆ្នាំ២០២២។ ចាប់តាំងពីពេលនោះមក ចិនបានលេចឡើងក្នុងនាមជាអ្នកទ្រទ្រង់ផ្នែកសេដ្ឋកិច្ច សម្រាប់រុស្ស៊ី ដោយបង្កើនពាណិជ្ជកម្មជាមួយប្រទេសជិតខាងភាគខាងជើងមួយនេះ ខណៈដែលមហាអំណាចលោកខាងលិច បានដាក់ទណ្ឌកម្មខ្លាំងឡើងៗ លើទីក្រុងមូស្គូ។

លោក ស៊ី និងលោក ពូទីន បានជួបគ្នាលើកចុងក្រោយ នៅទីក្រុងប៉េកាំង នៅពេលដែលចិនបានរៀបចំប្រារព្ធព្យុហយាត្រាយោធាដ៏ធំមួយ ក្នុងខែកញ្ញា ឆ្នាំ២០២៥ ដែលក៏មានការចូលរួមផងដែរ ពីសំណាក់មេដឹកនាំកូរ៉េខាងជើង លោក គីម ជុងអ៊ុន។

ក្នុងអំឡុងពេលនៃកិច្ចប្រជុំនោះ លោក ស៊ី បានសង្កត់ធ្ងន់ថា ទំនាក់ទំនងចិន-រុស្ស៊ី បាន «ទប់ទល់នឹងភាពចលាចលអន្តរជាតិ» ហើយបានសន្យាថា នឹងសម្របសម្រួលជាមួយទីក្រុងមូស្គូ ជុំវិញបញ្ហាទាក់ទងនឹងផលប្រយោជន៍ស្នូលរបស់ភាគីទាំង២៕