យោងតាមប្រភពវេជ្ជសាស្រ្ត បានឲ្យដឹងថា អ៊ីស្រាអែលបានសម្លាប់ជនប៉ាឡេស្ទីនយ៉ាងហោច ២១នាក់ នៅទូទាំងតំបន់ហ្កាហ្សាស្រ្ទីប ដែលស្ថិតក្នុងចំណោមថ្ងៃស្លាប់មនុស្សច្រើនបំផុត ចាប់តាំងពីបទឈប់បាញ់ខែតុលា ចាប់ផ្តើមចូលជាធរមាន ។

ប្រភពបានទម្លាយប្រាប់កាសែត Al Jazeera ថា ក្មេងៗជាច្រើននាក់ ស្ថិតនៅក្នុងចំណោមគ្រោះថ្នាក់ដល់អាយុជីវិតនៅថ្ងៃពុធនេះ ។ 

មនុស្សយ៉ាងហោច ១៤នាក់ ត្រូវបានសម្លាប់ នៅក្នុងការផ្លោងគ្រាប់កាំភ្លើងធំរបស់អ៊ីស្រាអែលលើសង្កាត់ Tuffah និងសង្កាត់ Zeitoun ស្ថិតក្នុងទីក្រុងហ្កាហ្សា ។ មនុស្ស ៤នាក់ ផ្សេងទៀត ត្រូវបានគេរាយការណ៍ថា បានស្លាប់ក្នុងការវាយប្រហារលើជម្រកសំពត់តង់របស់មនុស្សជម្លៀសខ្លួននៅតំបន់ Qizan Abu Rashwan ភាគខាងត្បូងទីក្រុង Khan Younis ។  

មនុស្ស ២នាក់ផ្សេងទៀត ត្រូវបានសម្លាប់នៅក្នុងការវាយប្រហារតាមច្រកអាកាសអ៊ីស្រាអែល លើជំរំសំពត់តង់តំបន់ឆ្នេរ al-Mawasi ។ ក្រុមអឌ្ឍចន្ទក្រហមប៉ាឡេស្ទីន និយាយថា ជនរងគ្រោះម្នាក់ គឺជាគ្រូពេទ្យបឋម ។

រាយការណ៍ចេញពីទីក្រុង Khan Younis លោក Tareq Abu Azzoum គឺជាអ្នកសារព័ត៌មានរបស់កាសែត Al Jazeera និយាយថា ផ្ទះសម្បែងរបស់អ្នកស្រុកជាច្រើន នៅទីក្រុងហ្កាហ្សា បានក្លាយជាគោលដៅវាយប្រហារ ដោយគ្មានការព្រមានជាមុននោះទេ ។

លោក Abu Azzoum និយាយថា ការវាយប្រហារនៅតែបន្តកើតឡើង បើទោះបីបទឈប់បាញ់រៀបចំឡើងដោយសហរដ្ឋអាមេរិកនៅចូលជាធរមានក៏ដោយ ធ្វើឲ្យជនប៉ាឡេស្ទីនៅតំបន់ហ្កាហ្សាគ្មានអារម្មណ៍ធូរស្រាលនោះឡើយ ។ 

លោកបន្តថា មាននូវការកញ្ជ្រោលឡើងសកម្មភាពយោធាអ៊ីស្រាអែលនៅទូទាំងតំបន់ហ្កាហ្សា ក្នុងរយៈពេលប៉ុន្មានម៉ោងចុងក្រោយនេះ ។ ពួកយើងអាចឮសំឡេងយានដ្រូនអ៊ីស្រាអែល ហោះសំកាំងពីលើក្បាលរបស់ពួកយើង ជាសញ្ញាមួយបង្ហាញថា ការវាយប្រហារដ៏មានសក្តានុពល អាចនឹងកើតឡើងបន្ថែមទៀត ។

យោធាអ៊ីស្រាអែល និយាយថា អង្គភាពរថពាសដែករបស់ខ្លួន និងកងយន្តហោះ បានបើកការវាយប្រហារនៅភាគខាងជើងតំបន់ហ្កាហ្សា ក្រោយទាហានបម្រុងម្នាក់ រងការបាញ់ប្រហារបណ្តាលឲ្យរងរបួសធ្ងន់ធ្ងរ ៕