នគរបាលអង់គ្លេស នៅថ្ងៃពុធ (ទី៤ ខែកុម្ភៈ ឆ្នាំ២០២៦) បានប្រាប់ឲ្យដឹងថា ពួកគេបានចាប់ខ្លួនបុរសអាយុ ១៨ឆ្នាំម្នាក់ បន្ទាប់ពីបុរសម្នាក់ទៀតអាយុ ២០ឆ្នាំប្លាយ បានបាត់បង់ជីវិត បន្ទាប់ពីត្រូវបានចាក់ នៅយប់មុននោះ នៅក្នុងទីក្រុង Leicester ភាគកណ្តាលប្រទេសអង់គ្លេស។

នគរបាលតំបន់ Leicestershire បានឲ្យដឹងនៅលើបណ្ដាញសង្គម X ថា មិនមាន «ហេតុការណ៍ចាក់មនុស្សជាច្រើននាក់» នៅក្នុងទីក្រុងនេះនោះទេ ដោយបានបន្ថែមថា ពាក្យចចាមអារ៉ាម គឺផ្ទុយស្រឡះ។ សាកលវិទ្យាល័យ De Montfort University នៅមុននេះ បានចេញសេចក្តីថ្លែងការណ៍មួយ ដោយប្រាប់ថា មាន «ឧប្បត្តិហេតុធ្ងន់ធ្ងរខ្លាំង» នៅជុំវិញបរិវេណសាកលវិទ្យាល័យ ក្នុងទីក្រុងនេះ។

មន្ត្រីនគរបាលបានឲ្យដឹងថា ពួកគេបានបិទតំបន់ នៅជុំវិញបរិវេណសាកលវិទ្យាល័យ ហើយសេវារថយន្តសង្គ្រោះបន្ទាន់ បានដឹកបុរសម្នាក់អាយុ ២០ឆ្នាំប្លាយ ទៅកាន់មន្ទីរពេទ្យ ដែលនៅទីនោះ «រូបគេបានបាត់បង់ជីវិត ក្នុងរយៈពេលមិនជាយូរប៉ុន្មានក្រោយមក»។

នគរបាលបានបន្ថែមថា «បុរសអាយុ ១៨ឆ្នាំម្នាក់ ត្រូវបានចាប់ខ្លួនពីបទសង្ស័យប្រព្រឹត្តឃាតកម្ម ហើយបច្ចុប្បន្នកំពុងស្ថិតក្នុងការឃុំឃាំងរបស់នគរបាល»៕