​បាល់ទាត់៖ ​ក្លិប​ Chelsea បាន​សម្រេច​ដក​សំណើ​របស់​ខ្លួន ​ក្នុង​ការ​ស្នើសុំ​ប្រកួត​បិទទ្វារ​សំរាប់​ការ​ប្រកួត FA Cup ក្នុង​ដី​ថ្ងៃ​សៅរ៍​នេះ​ពេល​ជួប​ជាមួយ Middlesbrough នេះ​បើ​តាម​ការ​បញ្ជាក់​របស់​សមាគម​បាល់ទាត់​អង់គ្លេស FA​។ ​​ក្លិប​បាល់ទាត់​នៅ​ក្រប​ខណ្ឌ English Premier League មួយ​នេះ​មិន​ត្រូវ​បាន​អនុញ្ញាត​ឱ្យ​លក់​សំបុត្រ​ឡើយ បន្ទាប់ពី​រដ្ឋាភិបាល​អង់គ្លេស​សម្រេច​ដាក់ទណ្ឌកម្ម​ថៅកែ​ក្លិប​សញ្ជាតិ​រុស្ស៊ី​លោក Roman Abramovich​។​

FA បាន​ឲ្យ​ដឹង​ថា "​បន្ទាប់ពី​កិច្ចពិភាក្សា​ក្នុង​ន័យ​ស្ថាបនា​រវាង FA និង Chelsea ក្លឹប​បាន​យល់ព្រម​លុបចោល​សំណើ​របស់​ពួកគេ​"។​ FA នៅតែ​ស្ថិតក្នុង​ការពិភាក្សា​បន្ត​ជាមួយ Chelsea ក្របខ័ណ្ឌ Premier League និង​រដ្ឋាភិបាល​ដើម្បី​ស្វែងរក​ដំណោះស្រាយ​ដែល​អាចឱ្យ​អ្នកគាំទ្រ Chelsea ចូលរួម​ទស្សនា​ទាំង​ការប្រកួត​ក្នុង និង​ក្រៅ​ដី​បាន តែ​នៅតែ​ធានាបាន​ថាមិន​បំពាន​ការដាក់ទណ្ឌកម្ម ពោលគឺ​ធានាថា "​មិនមាន​ប្រាក់ចំណូល​បន្ថែម​អាច​ត្រូវបាន​ផ្តល់ឱ្យ​ក្លឹប​ដែលជា​កម្មសិទ្ធិ​រប​ស់បុ​គ្គល ​ដែល​ឥឡូវនេះ​ត្រូវបាន​ដាក់ទណ្ឌកម្ម​នៅក្នុងចក្រភព​អង់គ្លេស​"​។​

​​សូមបញ្ជាក់ថា ការដាក់ទណ្ឌកម្ម​រប​ស់​រដ្ឋាភិបាល​អង់គ្លេស​ គឺ​ដើម្បី​ដាក់​សម្ពាធលើ​រុស្ស៊ី​ដែល​បាន និង​កំពុង​វាយលុក​ឈ្លានពាន​ចូល​ទឹកដី​អ៊ុយ​ក្រែ​ន​។ ​​តែ​នៅពេលនេះ​បញ្ហានយោបាយក៏បាន​ធ្វើឱ្យ​អនាគត​ក្លិប​បាល់ទាត់​ជោគជ័យ និង​មាន​ប្រជាប្រិយភាព​មួយ​លើពិភពលោក​ស្ថិតក្នុង​មន្ទិល​ផងដែរ​៕

​អត្ថបទ​៖​នាង សុភា​វុ​ធ