ក្រុមមន្ត្រីមកពីភាគីទាំងពីរបានបញ្ចាក់ថា សហរដ្ឋអាមេរិក និងអ៊ីរ៉ង់ បានឯកភាពគ្នាធ្វើកិច្ចចរចានៅប្រទេសអូម៉ង់ នៅថ្ងៃសុក្រ ទី៦ ខែកុម្ភៈ ស្អែកនេះ ទោះបីជាប្រទេសទាំងពីរនៅតែខ្វែងគំនិតគ្នាលើរបៀបវារៈនៃកិច្ចពិភាក្សាក៏ដោយ ខណៈទីក្រុងវ៉ាស៊ីនតោនទទូចថា ការចរចាត្រូវរួមបញ្ជូលប្រធានបទនៃឃ្លាំងមីស៊ីលបាលីស្ទិករបស់ទីក្រុងតេអេរ៉ង់ ប៉ុន្តែអ៊ីរ៉ង់ ចង់ពិភាក្សាតែអំពីកម្មវិធីនុយក្លេអ៊ែររបស់ខ្លួនប៉ុណ្ណោះ។

កិច្ចប្រឹងប្រែងផ្នែកការទូតដ៏ផុយស្រួយនេះ បានកើតឡើងស្របពេលមានភាពតានតឹងកាន់តែខ្លាំង ខណៈដែលសហរដ្ឋអាមេរិក កំពុងបង្កើនកងកម្លាំងរបស់ខ្លួននៅមជ្ឈិមបូព៌ា ហើយប្រទេសក្នុងតំបន់ ព្យាយាមបញ្ចៀសការប្រឈមមុខដាក់គ្នាខាងយោធា ដែលមនុស្សជាច្រើនភ័យខ្លាចថា អាចរាលដាលក្លាយជាសង្គ្រាមកាន់តែទូលំទូលាយ។

ការខ្វែងគំនិតគ្នាក្នុងប៉ុន្មានថ្ងៃថ្មីៗនេះលើវិសាលភាពនិងទីកន្លែងសម្រាប់កិច្ចពិភាក្សា បានបង្កើនការសង្ស័យថា តើកិច្ចប្រជុំនេះនឹងកើតឡើងដែរឬទេ។ ការដែលពុំមានកិច្ចចរចា បង្ហាញពីលទ្ធភាពខ្ពស់ដែលលោកប្រធានាធិបតីអាមេរិក Donald Trump អាចនឹងអនុវត្តការគំរាមកំហែងរបស់លោកក្នុងការវាយប្រហារលើអ៊ីរ៉ង់ ដោយសារលោកបានគំរាមប្រើសកម្មភាពយោធាម្ដងហើយម្ដងទៀត ប្រសិនបើពុំមានកិច្ចព្រមព្រៀងណាមួយទេនោះ។

នៅពេលត្រូវអ្នកសារព័តមានសាកសួរកាលពីថ្ងៃពុធ ថាតើមេដឹកនាំកំពូលអ៊ីរ៉ង់ Ayatollah Ali Khamenei គួរព្រួយបារម្ភឬទេ លោក Trump បានប្រាប់ទូរទស្សន៍ NBC ថា «លោក Khamenei គួរតែបារម្ភ ហើយបារម្ភខ្លាំងទៀតផង» ដោយបន្ថែមថា «អ៊ីរ៉ង់កំពុងចរចាជាមួយអាមេរិក» ប៉ុន្តែលោកមិនបានលម្អិតច្រើននោះទេ។ បន្ទាប់ពីការអត្ថាធិប្បាយលោក Trump ក្រុមមន្ត្រីសហរដ្ឋអាមេរិក និងអ៊ីរ៉ង់បាននិយាយថា ភាគីទាំងពីរបានព្រមព្រៀងគ្នាប្តូរទីតាំងចរចាទៅកាន់រដ្ឋធានីម៉ាស្កាត របស់អូម៉ង់ បន្ទាប់ពីដំបូងឡើយ ទទួលយកទីក្រុងអ៊ីស្តង់ប៊ុល របស់ទួរគី៕