កិច្ចចរចាថ្ងៃដំបូងរវាងអ៊ុយក្រែន រុស្ស៊ី និងសហរដ្ឋអាមេរិក បំណងសម្របសម្រួលការបញ្ចប់សង្គ្រាមនៅអ៊ុយក្រែន បានបញ្ចប់កាលពីថ្ងៃពុធ ៤ កុម្ភៈ សប្ដាហ៍នេះ នៅទីក្រុងអាប៊ូដាប៊ី ប្រទេសអេមីរ៉ាត អារ៉ាប់រួម ដោយទីក្រុងគីវបានហៅការចរចានោះថាមានភាពប្រាកដប្រជា និងប្រកបដោយផ្លែផ្កា។

ទីក្រុងគីវបាននិយាយថា ខណៈពុំមានការទម្លាយភាពទាល់ច្រកណាមួយនៅក្នុងការពិភាក្សាជុំចុងក្រោយបំផុត កិច្ចប្រជុំត្រូវបានគ្រោងបន្តទៅថ្ងៃទីពីរ គឺថ្ងៃ៥កុម្ភៈនេះ។        

កិច្ចចរចាដែលសម្របសម្រួលដោយសហរដ្ឋអាមេរិកពេលនេះ គឺជាកិច្ចចរចាចុងក្រោយបំផុតផ្នែកការទូតដ៏ច្របូកច្របល់ ដែលរហូតមកដល់ពេលនេះបានបរាជ័យក្នុងការឈានដល់កិច្ចព្រមព្រៀងដើម្បីបញ្ឈប់សង្គ្រាម បង្កឡើងដោយការឈ្លានពានរបស់រុស្ស៊ីក្នុងខែកុម្ភៈ ឆ្នាំ២០២២។

ដោយបញ្ជាក់ពីចំនួនមនុស្សស្លាប់ពីជម្លោះនេះ ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃពុធថា កងទ័ពចំនួន ៥៥.០០០នាក់របស់ប្រទេសលោក បានស្លាប់ ជាការវាយតម្លៃដ៏កម្រមួយអំពីការខាតបង់នៅសមរភូមិ ដែលទាំងទីក្រុងមូស្គូ និងទីក្រុងគីវជាធម្មតាពុំបានផ្តល់ឱ្យឡើយ។   

សង្គ្រាមនេះបានវិវត្តទៅជាជម្លោះដ៏សាហាវបំផុតរបស់អឺរ៉ុបចាប់តាំងពីសង្គ្រាមលោកលើកទី ២ ដោយមានមនុស្សរាប់សែននាក់បានស្លាប់ មនុស្សរាប់លាននាក់ត្រូវបានបង្ខំឱ្យភៀសខ្លួនចេញពីផ្ទះសម្បែងរបស់ពួកគេនៅក្នុងប្រទេសអ៊ុយក្រែន និងតំបន់ភាគខាងកើត និងខាងត្បូងនៃប្រទេសនេះ ដែលភាគច្រើនត្រូវបានរងការបំផ្លិចបំផ្លាញយ៉ាងធ្ងន់ធ្ងរ។

ការចរចាកាលពីថ្ងៃពុធសប្ដាហ៍នេះ បានកើតឡើងបន្ទាប់ពីការវាយប្រហាររបស់រុស្ស៊ីអស់រយៈពេលជាច្រើនសប្តាហ៍លើហេដ្ឋារចនាសម្ព័ន្ធថាមពលរបស់អ៊ុយក្រែន ដែលបានធ្វើឱ្យពលរដ្ឋទីក្រុងគីវស្ថិតក្នុងភាពងងឹត និងត្រជាក់ ដោយសីតុណ្ហភាពធ្លាក់ចុះដល់ -២០ អង្សាសេ៕