លោក Tom Homan មន្រ្តីជាន់ខ្ពស់ផ្នែកព្រំដែនរបស់សេតវិមាន បានប្រកាសនៅថ្ងៃពុធ (៤ កុម្ភៈ) ថា រដ្ឋបាលលោកប្រធានាធិបតីអាមេរិក Donald Trump កំពុងដកភ្នាក់ងារអនុវត្តច្បាប់អន្តោប្រវេសន៍សហព័ន្ធប្រហែល ៧០០នាក់ ចេញពីរដ្ឋ Minnesota ប៉ុន្តែភ្នាក់ងារប្រហែល ២.០០០នាក់ទៀត នឹងបន្តនៅទីនោះ នៅក្នុងតួលេខមួយដែលថ្នាក់ដឹកនាំមូលដ្ឋាននិយាយថា នៅតែខ្ពស់ពេកហើយ។

កាលពីដើមខែមករា លោក Trump បានដាក់ពង្រាយភ្នាក់ងារអនុវត្តច្បាប់អន្តោប្រវេសន៍ ដែលប្រដាប់ដោយអាវុធប្រហែល ២.០០០នាក់ ទាំងនៅក្នុងនិងជុំវិញទីក្រុង Minneapolis ដើម្បីឃុំខ្លួននិងនិរទេសជនអន្តោប្រវេសន៍ ដែលបណ្តាលឱ្យមានជម្លោះជាច្រើនសប្តាហ៍ជាមួយថ្នាក់ដឹកនាំរដ្ឋ ការប្រឈមមុខដាក់គ្នាដោយកំហឹងនិងជួនកាលហិង្សាជាមួយប្រជាពលរដ្ឋ និងការតវ៉ាតាមដងផ្លូវទូទាំងប្រទេស។ ភ្នាក់ងាររាប់រយនាក់ទៀតត្រូវបានដាក់ពង្រាយបន្ថែមដើម្បីទប់ទល់បាតុកម្ម ហើយគិតត្រឹមចុងខែមករាកន្លងទៅ មន្រ្តីអន្តោប្រវេសន៍មានចំនួនប្រមាណ ៣.០០០នាក់។

លោក Homan បាននិយាយថា យុទ្ធនាការនិរទេសនេះគឺជាផលប្រយោជន៍នៃសុវត្ថិភាពសាធារណៈ ដោយបន្តថា លោកបន្ថយការដាក់ពង្រាយមួយផ្នែក ពីព្រោះលោកបានមើលឃើញកិច្ចសហប្រតិបត្តិការ «ដែលមិនធ្លាប់មានពីមុនមក» ពីក្រុមមន្ត្រីអនុវត្តច្បាប់របស់រដ្ឋ Minnesota ដែលគ្រប់គ្រងពន្ធនាគារក្នុងស្រុក ប៉ុន្តែលោកមិនផ្តល់ព័ត៌មានលម្អិតបន្ថែមនោះទេ។

នៅពេលត្រូវសាកសួរអំពីការប្រកាសរបស់លោក Homan លោក Trump បានប្រាប់ទូរទស្សន៍ NBC ថា «លោកបានដឹងថា ប្រហែលជារដ្ឋបាលគួរតែប្រើជំហរទន់ភ្លន់ជាងនេះបន្តិច ប៉ុន្តែក៏នឹងត្រូវតែមានភាពម៉ឺងម៉ាត់ដែរ»។ ការកាត់បន្ថយតួលេខភ្នាក់ងារដែលត្រូវបានប្រកាសនៅថ្ងៃពុធនោះ នៅតែបន្សល់ទុកនូវភ្នាក់ងារអន្តោប្រវេសន៍មួយចំនួនធំក្នុងរដ្ឋ Minnesota ជាតួលេខដែលក្រុមមន្ត្រីលោក Trump ផ្ទាល់បានហៅថា មិនធ្លាប់មានពីមុនមកនោះទេ៕