អគ្គលេខាធិការអង្គការសហប្រជាជាតិ លោក Antonio Guterres កាលពីថ្ងៃពុធ (៤ កុម្ភៈ) បានហៅការផុតសុពលភាពនៃសន្ធិសញ្ញានុយក្លេអ៊ែរ New START រវាងមហាអំណាចអាមេរិក និងរុស្ស៊ី ថាជាពេលវេលាដ៏គ្រោះថ្នាក់ធ្ងន់ធ្ងរមួយសម្រាប់សន្តិភាព និងសន្តិសុខអន្តរជាតិ ហើយបានជំរុញឱ្យទីក្រុងមូស្គូ និងទីក្រុងវ៉ាស៊ីនតោន ចរចាលើក្របខណ្ឌគ្រប់គ្រងអាវុធនុយក្លេអ៊ែរថ្មីមួយ ដោយមិនបង្អង់យូរ។

សន្ធិសញ្ញា New START ដែលគ្រោងផុតកំណត់បន្ទាប់ពីពេលពាក់កណ្តាលអធ្រាត្រថ្ងៃពុធឈានចូលថ្ងៃព្រហស្បតិ៍ ទី៥ ខែកុម្ភៈ នេះ គឺជាកិច្ចព្រមព្រៀងកំណត់ចំនួនក្បាលគ្រាប់នុយក្លេអ៊ែរយុទ្ធសាស្ត្រ ដែលសហរដ្ឋអាមេរិកនិងរុស្ស៊ីអាចដាក់ពង្រាយ ក៏ដូចជាការដាក់ពង្រាយមីស៊ីល និងយន្តហោះទម្លាក់គ្រាប់បែកដែលមានមូលដ្ឋានលើដីគោកនិងនាវាមុជទឹក ដើម្បីបាញ់មីស៊ីលទាំងនោះ។

នៅក្នុងសេចក្តីថ្លែងការណ៍មួយ លោក Guterres បានថ្លែងថា៖ «ជាលើកដំបូងក្នុងពេលជាងកន្លះសតវត្សរ៍មកនេះ គ្រប់គ្នាប្រឈមមុខនឹងពិភពលោកដែលគ្មានដែនកំណត់ណាមួយលើឃ្លាំងអាវុធនុយក្លេអ៊ែរជាយុទ្ធសាស្ត្ររបស់សហព័ន្ធរុស្ស៊ី និងសហរដ្ឋអាមេរិក — ជារដ្ឋទាំងពីរដែលមានស្តុកអាវុធនុយក្លេអ៊ែរយ៉ាងច្រើនលើសលប់ទូទាំងពិភពលោក»។

ប្រមុខ UN រូបនេះបន្តថា ការរំលាយសមិទ្ធផលរាប់ទសវត្សរ៍នៃការគ្រប់គ្រងអាវុធ «កើតឡើងចំពេលដ៏អាក្រក់រួចទៅហើយ ពោលគឺ ហានិភ័យនៃការប្រើប្រាស់អាវុធនុយក្លេអ៊ែរគឺខ្ពស់បំផុតក្នុងពេលជាច្រើនទសវត្សរ៍»។ លោក Guterres បន្ថែមថា ឥឡូវនេះមានឱកាសមួយ «ដើម្បីកំណត់ឡើងវិញ និងបង្កើតរបបគ្រប់គ្រងអាវុធដ៏សមស្របសម្រាប់បរិបទដែលកំពុងវិវត្តយ៉ាងឆាប់រហ័ស» ហើយក៏បានស្វាគមន៍ចំពោះការកោតសរសើរពីមេដឹកនាំទាំងរុស្ស៊ី និងអាមេរិក ចំពោះតម្រូវការក្នុងការទប់ស្កាត់ការវិលត្រឡប់ទៅកាន់ពិភពលោកនៃការរីកសាយភាយនុយក្លេអ៊ែរដែលមិនអាចគ្រប់គ្រងបាន៕