លោកប្រធានាធិបតី Donald Trump បាននិយាយកាលពីថ្ងៃទី ៤ កុម្ភៈសប្ដាហ៍នេះ ថា រូបលោក និងលោកប្រធានាធិបតីចិន Xi Jinping បានពិភាក្សាអំពីស្ថានភាពនៅប្រទេសអ៊ីរ៉ង់ក្នុងជំនួបតាមទូរស័ព្ទ ដែលកើតឡើងខណៈរដ្ឋបាលអាមេរិក ជំរុញឱ្យទីក្រុងប៉េកាំង និងប្រទេសដទៃទៀតដាក់ទីក្រុងតេអេរ៉ង់ ឱ្យនៅឯកា។

លោក Trump និយាយថា លោកបានមានជំនួបតាមទូរស័ព្ទ ដ៏ល្អឥតខ្ចោះ រយៈពេលយូរ និងហ្មត់ចត់ ជាមួយលោក Xi មុនពេលដំណើរទស្សនកិច្ចផ្លូវការទៅកាន់ទីក្រុងប៉េកាំងនាពេលខាងមុខ។

ប្រធានាធិបតីសហរដ្ឋអាមេរិករូបនេះបាននិយាយថា លោកទាំងពីរបានពិភាក្សាអំពី ពាណិជ្ជកម្ម យោធា ដំណើរទស្សនកិច្ចខែមេសាដែលរូបលោកនឹងទៅកាន់ប្រទេសចិន ដោយលោកទន្ទឹងរង់ចាំយ៉ាងខ្លាំង! បញ្ហាកោះតៃវ៉ាន់ សង្គ្រាមរវាងរុស្ស៊ី និងអ៊ុយក្រែន ស្ថានភាពបច្ចុប្បន្នជាមួយអ៊ីរ៉ង់ ការទិញប្រេង និងឧស្ម័នដោយប្រទេសចិនពីសហរដ្ឋអាមេរិក និងបញ្ហាផ្សេងៗទៀត។

លោក Trump និយាយថា ចិនកំពុងពិចារណាលើការទិញផលិតផលកសិកម្មបន្ថែមរបស់សហរដ្ឋអាមេរិក ក៏ដូចជាការដឹកជញ្ជូនម៉ាស៊ីនយន្តហោះដែលកំពុងរង់ចាំ។

លោកបាននិយាយនៅលើបណ្ដាញសង្គម Truth Social របស់លោកថា ទំនាក់ទំនងជាមួយចិន និងទំនាក់ទំនងផ្ទាល់ខ្លួនរបស់លោកជាមួយប្រធានាធិបតី Xi Jinping រលូនល្អណាស់ ហើយលោកទាំងពីរដឹងថាវាសំខាន់ប៉ុណ្ណាក្នុងការរក្សាមិត្តភាពនេះឱ្យនៅគង់វង្ស។ លោកជឿជាក់ថា នឹងមានលទ្ធផលវិជ្ជមានជាច្រើនដែលសម្រេចបានក្នុងរយៈពេលបីឆ្នាំខាងមុខនៃអាណត្តិប្រធានាធិបតីរបស់លោក ទាក់ទងនឹងលោកប្រធានាធិបតី Xi និងសាធារណរដ្ឋប្រជាមានិតចិន៕