អាជ្ញាធរសុខាភិបាលតំបន់ហ្កាហ្សានិយាយថា ការវាយប្រហារតាមអាកាសរបស់អ៊ីស្រាអែលកាលពីថ្ងៃពុធ ទី៤ ខែកុម្ភៈ បានសម្លាប់មនុស្សជាង២០នាក់ ដោយយោធាអ៊ីស្រាអែលនិយាយថា ការវាយប្រហារទាំងនេះគឺជាការឆ្លើយតបទៅនឹងមន្ត្រីម្នាក់ក្នុងចំណោមមន្ត្រីរបស់ខ្លួនបានរងរបួសដោយការបាញ់កាំភ្លើងរបស់សត្រូវ។ ទោះបីជាបទឈប់បាញ់សម្របសម្រួលដោយសហរដ្ឋអាមេរិកចូលដល់ដំណាក់កាលទីពីររបស់ខ្លួនកាលពីខែមុនក៏ដោយ អំពើហិង្សានៅតែបន្តនៅក្នុងតំបន់ហ្កាហ្សាដោយអ៊ីស្រាអែល និងក្រុមហាម៉ាសចោទប្រកាន់គ្នាទៅវិញទៅមកថាបានរំលោភលើកិច្ចព្រមព្រៀងនេះ។

ការបង្ហូរឈាមចុងក្រោយ បានកើតឡើងបន្ទាប់ពីអ៊ីស្រាអែលបានបើកឡើងវិញច្រកឆ្លងកាត់រ៉ាហ្វា រវាងតំបន់ហ្កាហ្សានិងប្រទេសអេហ្ស៊ីប ជាច្រកទ្វារតែមួយគត់ទៅកាន់ដែនដីប៉ាឡេស្ទីនដែលមិនឆ្លងកាត់ប្រទេសអ៊ីស្រាអែល។ អាជ្ញាធរសុខាភិបាលតំបន់ហ្កាហ្សា ដែលដំណើរការក្រោមអាជ្ញាធរក្រុមហាម៉ាស បាននិយាយថា មនុស្សជាង ២០នាក់ត្រូវបានសម្លាប់ រួមមានទាំងកុមារបីនាក់ នៅក្នុងការវាយប្រហារជាបន្តបន្ទាប់ ហើយយ៉ាងហោចណាស់មនុស្ស ៣៨ នាក់ផ្សេងទៀតបានរងរបួស។

យោធាអ៊ីស្រាអែលបាននិយាយថា ខ្លួនបានចាប់ផ្តើមការវាយប្រហារបន្ទាប់ពី«ភេរវករបានបើកការបាញ់ប្រហារលើកងទ័ព» កាលពីថ្ងៃពុធ ដែលបានធ្វើឱ្យមន្ត្រីម្នាក់រងរបួសធ្ងន់។

សហព័ន្ធសមាគមកាកបាទក្រហមនិងអឌ្ឍចន្ទក្រហមអន្តរជាតិ បាននិយាយថា ខ្លួនមាន «កំហឹង» ចំពោះការសម្លាប់គ្រូពេទ្យសង្គ្រោះបន្ទាន់ដែលកំពុងបំពេញកាតព្វកិច្ច ក្នុងការទម្លាក់គ្រាប់បែកនៅតំបន់ Al-Mawasi ភាគខាងត្បូង។