ប្រធានាធិបតីអ៊ុយក្រែន លោក Volodymyr Zelenskiy បានប្រាប់ទូរទស្សន៍បារាំង ថា ចំនួនទាហានអ៊ុយក្រែនដែលត្រូវបានសម្លាប់នៅលើសមរភូមិបណ្តាលមកពីសង្គ្រាមរបស់ប្រទេស ជាមួយរុស្ស៊ី ត្រូវបានប៉ាន់ប្រមាណថាមានចំនួន៥៥.០០០នាក់។

លោក Zelenskyy បាននិយាយក្នុងបទសម្ភាសន៍ដែលត្រូវបានថតទុកមុនត្រូវបានចាក់ផ្សាយកាលពីថ្ងៃពុធថា «នៅក្នុងប្រទេសអ៊ុយក្រែន ចំនួនទាហានជាផ្លូវការដែលត្រូវបានសម្លាប់នៅលើសមរភូមិ ទាំងអ្នកជំនាញ ឬអ្នកដែលត្រូវបានកេណ្ឌធ្វើទាហាន មាន៥៥.០០០នាក់»។

លោក Zelenskyy ដែលការថ្លែងរបស់លោកត្រូវបានបកប្រែជាភាសាបារាំង បាននិយាយបន្ថែមថា ក្រៅពីតួលេខអ្នកស្លាប់និងរងរបួស មាន«មនុស្សមួយចំនួនធំ» ត្រូវបានគេចាត់ទុកជាផ្លូវការថាបានបាត់ខ្លួន។

លោក Zelenskyy កាលពីពេលមុនបានលើកឡើងពីតួលេខសម្រាប់អ្នកស្លាប់អ៊ុយក្រែនដោយសារតែសង្គ្រាម នៅក្នុងបទសម្ភាសន៍ជាមួយបណ្តាញទូរទស្សន៍អាមេរិក NBC កាលពីក្នុងខែកុម្ភៈ ឆ្នាំ២០២៥ ដោយបាននិយាយថា ទាហានអ៊ុយក្រែនជាង ៤៦.០០០នាក់ត្រូវបានសម្លាប់នៅលើសមរភូមិ។