រុស្ស៊ី បានអះអាងកាលពីថ្ងៃពុធ (៤ កុម្ភៈ) ថា កងកម្លាំងរបស់ខ្លួនបានដណ្ដើមការគ្រប់គ្រងលើទីតាំងឈរជើងពីរកន្លែង ដែលមួយជាភូមិ Stepanivka ក្នុងតំបន់ Donetsk និងមួយទៀតគឺភូមិ Staroukrainka ក្នុងតំបន់ Zaporizhzhia របស់អ៊ុយក្រែន ស្របពេលកិច្ចចរចាសន្តិភាពកំពុងបន្តនៅទីក្រុងអាប៊ូដាប៊ី។

ក្រសួងការពារជាតិរុស្ស៊ី បាននិយាយក្នុងសេចក្តីថ្លែងការណ៍មួយថា អង្គភាពនៃក្រុមកងទ័ព Yuzhnoy បានដណ្តើមយកភូមិ Stepanivka «ជាលទ្ធផលនៃប្រតិបត្តិការយ៉ាងសកម្ម» ខណៈកងកម្លាំងមកពីក្រុមកងទ័ព Vostok បានរុលទៅមុខកាន់តែជ្រៅទៅក្នុងខ្សែការពាររបស់អ៊ុយក្រែន និងដណ្តើមយកភូមិ Staroukrainka នៅតំបន់ភាគអាគ្នេយ៍។

ភូមិទាំងនោះមានទីតាំងនៅជិតតំបន់ជួរមុខដ៏សកម្មនៅភាគខាងកើត និងភាគអាគ្នេយ៍របស់អ៊ុយក្រែន។ អាជ្ញាធរទីក្រុងគីវ មិនទាន់អត្ថាធិប្បាយលើការអះអាងនេះនៅឡើយទេ ហើយការផ្ទៀងផ្ទាត់ឯករាជ្យនៅតែពិបាក ដោយសារសង្គ្រាមកំពុងបន្ត ដែលឥឡូវនេះខិតជិតដល់ឆ្នាំទី៥ របស់ខ្លួនទៅហើយ។ យោធាអ៊ុយក្រែនធ្លាប់និយាយថា ការប្រយុទ្ធបានកើនឡើងយ៉ាងក្ដៅគគុកក្នុងប៉ុន្មានសប្តាហ៍ថ្មីៗនេះ ក្នុងតំបន់សំខាន់ៗនៃជួរមុខភាគអាគ្នេយ៍។

ការអះអាងជ័យជម្នះថ្មីៗក្នុងសមរភូមិ កើតឡើងស្របពេលកិច្ចចរចាត្រីភាគី រយៈពេល ២ថ្ងៃ ដែលដឹកនាំដោយសហរដ្ឋអាមេរិក បានបញ្ចប់ថ្ងៃទីមួយរបស់ខ្លួន។ ប្រធានអ្នកចរចារបស់រុស្ស៊ី បានហៅថ្ងៃដំបូងនៃជំនួបជុំថ្មីនេះថា «ប្រកបដោយផលិតភាព»។ រដ្ឋបាលអាមេរិក បានជំរុញទាំងទីក្រុងគីវ និងទីក្រុងមូស្គូ ឱ្យស្វែងរកការសម្របសម្រួលមួយ ដើម្បីបញ្ចប់សង្គ្រាមដ៏បង្ហូរឈាមជាច្រើនឆ្នាំមកនេះ ប៉ុន្តែភាគីទាំងពីរនៅតែខ្វែងគំនិតលើចំណុចសំខាន់ៗ ទោះបីជាមានការចរចាជាច្រើនជុំក៏ដោយ៕