អនុប្រធានាធិបតីអាមេរិក លោក JD Vance បាននិយាយនៅក្នុងបទសម្ភាសន៍ជាមួយអ្នកសារព័ត៌មាន អាមេរិក លោក Megyn Kelly ថា ប្រទេសនេះ នឹងធ្វើការជាមួយរុស្ស៊ី ចិន និងប្រទេសដទៃទៀត ដើម្បីកាត់បន្ថយបរិមាណអាវុធនុយក្លេអ៊ែរ នៅក្នុងពិភពលោក។

លោក Vance បានថ្លែងថា៖«យើងនឹងធ្វើការជាមួយចិន និងរុស្ស៊ី និងប្រទេសណាមួយ មិនថាពួកគេជាមិត្ត ឬយ៉ាងណាទេ ហើយយើងចាំបាច់ត្រូវខិតខំកែលម្អឲ្យបានច្រើនជាងមុន ដើម្បីកាត់បន្ថយបរិមាណអាវុធនុយក្លេអ៊ែរ ដែលមាននៅក្នុងពិភពលោក»។

នៅថ្ងៃទី ២២ ខែកញ្ញា ឆ្នាំ ២០២៥ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានថ្លែងនៅក្នុងកិច្ចប្រជុំជាមួយក្រុមប្រឹក្សាសន្តិសុខរុស្ស៊ីថា ទីក្រុងមូស្គូបានត្រៀមខ្លួនរួចជាស្រេច ដើម្បីបន្តប្រកាន់ខ្ជាប់នូវការរឹតបន្តឹងបរិមាណអាវុធនុយក្លេអ៊ែរ ក្រោមសន្ធិសញ្ញាកាត់បន្ថយអាវុធយុទ្ធសាស្ត្រថ្មី (New START) សម្រាប់   រយៈពេលមួយឆ្នាំទៀត បន្ទាប់ពីវាផុតកំណត់ នៅក្នុងខែកុម្ភៈ។ ជំនួយការវិមានក្រឹមឡាំង លោក Yury Ushakov បាននិយាយនៅក្នុងសន្និសីទសារព័ត៌មានមួយ នៅថ្ងៃទី ០៤ ខែកុម្ភៈថា ទីក្រុងមូស្គូនៅតែមិនទាន់ទទួលបានការឆ្លើយតបពីទីក្រុងវ៉ាស៊ីនតោនចំពោះសំណើរបស់ខ្លួន ក្នុងការបន្តការរឹតបន្តឹងក្រោមសន្ធិសញ្ញានេះទេ៕