លោក Andrey Bystritsky ប្រធានក្រុមប្រឹក្សាភិបាលនៃមូលនិធិសម្រាប់ការអភិវឌ្ឍ និងគាំទ្រនៃក្លិប ពិភាក្សា Valdai បានប្រាប់សារព័ត៌មាន TASS ថា ប្រទេសឥណ្ឌាកំពុងបង្ហាញពីចេតនាច្បាស់លាស់មួយ ដើម្បីបង្កើនទំនាក់ទំនងរបស់ខ្លួនជាមួយរុស្ស៊ីបន្ថែមទៀត។  

លោក Bystritsky បាននិយាយនៅខាងក្រៅសន្និសីទរុស្ស៊ី-ឥណ្ឌាលើកទី ៣នៃកិ្លបពិភាក្សាអន្តរជាតិ Valdai និងមូលនិធិអន្តរជាតិ Vivekananda នៅទីក្រុងញូវដែលីថា៖«អ្វីដែលយើងកំពុងឮនៅទីនេះ ក្នុងប្រទេសឥណ្ឌា គឺជាការសង្កត់ធ្ងន់ជាប់លាប់លើតម្រូវការក្នុងការពង្រីកកិច្ចសហប្រតិបត្តិការ។ ពុំមានការសង្ស័យអំពីរឿងនេះទេ។ ភាគីឥណ្ឌានិយាយអំពីកិច្ចសហប្រតិបត្តិការនេះដោយទំនុកចិត្ត»។

នៅពេលសួរអំពីថាតើការបញ្ចប់កិច្ចព្រមព្រៀងពាណិជ្ជកម្មរវាងឥណ្ឌា និងសហរដ្ឋអាមេរិក ដែលបានប្រកាសកាលពីដើមសប្តាហ៍នេះ អាចមានផលប៉ះពាល់អវិជ្ជមានដល់ទំនាក់ទំនងរុស្ស៊ី-ឥណ្ឌាដែរឬទេ លោក Bystritsky បាននិយាយថា នេះមិនទំនងមានផលប៉ះពាល់ទេ។ លោកបានកត់សម្គាល់ថា៖«ខ្ញុំមិនជឿថា វានឹងមានផលប៉ះពាល់អវិជ្ជមានគួរឲ្យកត់សម្គាល់នោះទេ»។

យោងតាមលោក Bystritsky ដូចប្រទេសដទៃទៀតដែរ ឥណ្ឌាត្រូវតែស្វែងរកតុល្យភាព និងយុទ្ធសាស្ត្រ។ លោកបាននិយាយថា៖«ពួកគេមានបញ្ហាប្រឈមរៀងៗខ្លួន។ ប៉ុន្តែសម្រាប់ពេលនេះ ពួកគេជាទូទៅកំពុងរុករកក្នុងច្រករបៀងជាក់លាក់មួយ ហើយមិនបានបោះជំហានហួសពីវាទេ» ដោយបន្ថែមថា «វាជាពេលវេលាដែលមានភាពប្រែប្រួលខ្លាំង នៅពេលនេះ ហើយវាពិបាកក្នុងការទស្សន៍ទាយអ្វីៗទាំងអស់»៕