ប្រធានាធិបតីចិន លោក ស៊ី ជីនពីង (Xi Jinping) កាលពីថ្ងៃពុធ (ទី៤ ខែកុម្ភៈ ឆ្នាំ២០២៦) បានជំរុញឲ្យទីក្រុងវ៉ាស៊ីនតោនដោះស្រាយការលក់អាវុធទៅឲ្យកោះតៃវ៉ាន់ប្រកបដោយភាពប្រុងប្រយ័ត្ន ដោយបានបញ្ជាក់ថា ទីក្រុងប៉េកាំង នឹងមិនអនុញ្ញាតឲ្យកោះនេះ ត្រូវបាន «ផ្ដាច់ចេញ» ពីប្រទេសចិនឡើយ។

អ្នកនាំពាក្យក្រសួងការបរទេសចិន លោកស្រី Mao Ning បានឲ្យដឹងនៅបណ្ដាញសង្គម X ថា ក្នុងអំឡុងពេលសន្ទនាតាមទូរសព្ទជាមួយប្រធានាធិបតីអាមេរិក លោក Donald Trump លោកស៊ី បានបង្ហាញពីបំណងប្រាថ្នារបស់លោក ក្នុងការ «ធ្វើឲ្យទំនាក់ទំនងចិន-អាមេរិកឆ្ពោះទៅមុខជាលំដាប់ ដោយឆ្លងកាត់ឲ្យបាននូវបញ្ហាធំៗ» រួមជាមួយលោក Trump ហើយ «សម្រេចឲ្យបាននូវរឿងធំៗ និងរឿងល្អៗជាច្រើនទៀត»។

លោក ស៊ី បានមានប្រសាសន៍ថា៖ «យើងគួរតែធ្វើឲ្យមានវឌ្ឍនភាពមួយជំហានម្តងៗ ដើម្បីកសាងទំនុកចិត្តឲ្យគ្នាទៅវិញទៅមក ស្វែងរកវិធីត្រឹមត្រូវ ដើម្បីរួមរស់ជាមួយគ្នា និងធ្វើឲ្យឆ្នាំ២០២៦ ជាឆ្នាំដែលប្រទេសធំៗទាំង២ ឈានទៅរកការគោរពគ្នាទៅវិញទៅមក រួមរស់ជាមួយគ្នាដោយសន្តិភាព និងមានកិច្ចសហប្រតិបត្តិការឈ្នះ-ឈ្នះ»។

ជាមួយគ្នានេះ អំឡុងជជែកតាមទូរស័ព្ទនោះ លោក ស៊ី ក៏បានសង្កត់ធ្ងន់ពីកោះតៃវ៉ាន់ផងដែរ ដោយចាត់ទុកថា នេះគឺជា «បញ្ហាសំខាន់បំផុតនៅក្នុងទំនាក់ទំនងចិន-អាមេរិក»។ លោកបាននិយាយថា៖ «ប្រទេសចិនត្រូវតែការពារអធិបតេយ្យភាព និងបូរណភាពទឹកដីរបស់ខ្លួន ហើយនឹងមិនអនុញ្ញាតឲ្យកោះតៃវ៉ាន់ត្រូវបានផ្ដាច់ចេញ (ពីប្រទេសចិន) ឡើយ»។

លោក ស៊ី បានជំរុញឲ្យទីក្រុងវ៉ាស៊ីនតោន «ដោះស្រាយបញ្ហាលក់អាវុធទៅឲ្យកោះតៃវ៉ាន់ប្រកបដោយភាពប្រយ័ត្នប្រយែង»។ 

ថ្មីៗនេះ សហរដ្ឋអាមេរិកទើបតែបានអនុម័តការលក់អាវុធដែលមានតម្លៃជាង ១១ពាន់លានដុល្លារទៅឲ្យទីក្រុងតៃប៉ិ៕