កាលពីពុធថ្ងៃ (ទី៤ ខែកុម្ភៈ ឆ្នាំ២០២៦) រុស្ស៊ីបានឲ្យដឹងថា ខ្លួន «លែងត្រូវបានចង» ដោយការកំណត់ចំនួនក្បាលគ្រាប់នុយក្លេអ៊ែរដែលខ្លួនអាចដាក់ពង្រាយហើយ ខណៈដែលសន្ធិសញ្ញាគ្រប់គ្រងអាវុធចុងក្រោយរបស់ខ្លួន ជាមួយសហរដ្ឋអាមេរិក ត្រូវផុតកំណត់។

កិច្ចព្រមព្រៀង New START នឹងបញ្ចប់នៅថ្ងៃទី៥ ខែកុម្ភៈនេះ ដោយធ្វើឲ្យទាំងទីក្រុងមូស្គូ និងវ៉ាស៊ីនតោនលែងមានការរឹតបន្តឹងច្រើន លើឃ្លាំងអាវុធនុយក្លេអ៊ែររបស់ពួកគេហើយ។

អ្នកធ្វើយុទ្ធនាការបានព្រមានថា ការដួលរលំនៃសន្ធិសញ្ញានេះ អាចបង្កឲ្យមានការប្រណាំងប្រជែងអាវុធថ្មីរវាងមហាអំណាចនុយក្លេអ៊ែរកំពូលៗរបស់ពិភពលោក និងជំរុញឲ្យប្រទេសចិនពង្រីកឃ្លាំងអាវុធរបស់ខ្លួន។

ក្រសួងការបរទេសរុស្ស៊ីបានឲ្យដឹងនៅក្នុងសេចក្តីថ្លែងការណ៍មួយថា «យើងដឹងថា ភាគីនៃសន្ធិសញ្ញា New START លែងត្រូវបានចងដោយកាតព្វកិច្ច ឬសេចក្តីប្រកាសស៊ីមេទ្រីណាមួយ នៅក្នុងបរិបទនៃសន្ធិសញ្ញាទៀតហើយ»។

ក្រសួងបានបន្ថែមថា «សហព័ន្ធរុស្ស៊ីមានបំណងធ្វើសកម្មភាព ដោយមានការទទួលខុសត្រូវ និងប្រុងប្រយ័ត្ន» ប៉ុន្តែបានព្រមានថា ខ្លួនបានត្រៀមខ្លួនរួចជាស្រេច ដើម្បីចាត់វិធានការតបត «ដ៏ម៉ឺងម៉ាត់» ប្រសិនបើសន្តិសុខជាតិរបស់ខ្លួន ត្រូវបានគំរាមកំហែង។

វិមានក្រឹមឡាំង បានឲ្យដឹងថា ប្រធានាធិបតីរុស្ស៊ី វ្ល៉ាឌីមៀរ ពូទីន កាលពីខែកញ្ញាឆ្នាំមុន បានស្នើឲ្យបន្តគោរពតាមលក្ខខណ្ឌកំណត់ក្បាលគ្រាប់នុយក្លេអ៊ែរ នៅក្នុងសន្ធិសញ្ញានេះ រយៈពេលមួយឆ្នាំទៀត ប៉ុន្តែលោកមិនបានទទួលការឆ្លើយតបជាផ្លូវការពីទីក្រុងវ៉ាស៊ីនតោនឡើយ៕