អតីតសមាជិកសភាអាមេរិក លោក Dennis Kucinich បានប្រាប់សារព័ត៌មាន TASSថា កិច្ចព្រមព្រៀងរវាងរុស្ស៊ី និងសហរដ្ឋអាមេរិកស្តីពីការគ្រប់គ្រងអាវុធនុយក្លេអ៊ែរ គឺចាំបាច់សម្រាប់ការរស់រានមានជីវិតរបស់មនុស្សជាតិ។ 

ដោយធ្វើអត្ថាធិប្បាយអំពីការផុតកំណត់នៃសន្ធិសញ្ញាកាត់បន្ថយអាវុធយុទ្ធសាស្ត្រថ្មី (New START) អ្នកនយោបាយរូបនេះ ដែលបានឈរឈ្មោះជាប្រធានាធិបតីក្នុងឆ្នាំ ២០០៤ និង ២០០៨ និងជាអភិបាលក្រុង Cleveland រដ្ឋ Ohio បាននិយាយថា៖«វានៅតែជាបញ្ហាបន្ទាន់ដែលសហរដ្ឋអាមេរិកបោះជំហានទៅមុខដើម្បីជួយសង្គ្រោះសន្ធិសញ្ញាកាត់បន្ថយអាវុធយុទ្ធសាស្ត្រថ្មី ដើម្បីជាប្រយោជន៍ដល់ការរស់រានមានជីវិតរបស់មនុស្សជាតិ»។ លោក Kucinich បានកត់សម្គាល់៖ «ក្នុងនាមជាមហាអំណាចនុយក្លេអ៊ែរពីរ នៅពេលនេះ រុស្ស៊ី និងសហរដ្ឋអាមេរិក មានឱកាសដើម្បីបង្ហាញដល់ពិភពលោកអំពីលក្ខណៈធ្ងន់ធ្ងរនៃការកាត់បន្ថយចំនួនអាវុធនុយក្លេអ៊ែរ នៅក្នុងឃ្លាំងអាវុធរបស់យើង។ បើមិនដូច្នោះទេ ការដួលរលំដោយចេតនានៃសន្ធិសញ្ញា នឹងត្រូវបានគេមើលឃើញថា ជាអាជ្ញាប័ណ្ណសម្រាប់ការបង្កើតអាវុធនុយក្លេអ៊ែរជុំថ្មី។ ការរីកសាយភាយ នឹងមានទូទាំងពិភពលោក»។

អតីតសមាជិកសភារូបនេះ បានបន្ថែមថា៖«ជនជាតិរុស្ស៊ី និងអាមេរិកចែករំលែកចំណាប់អារម្មណ៍រួម ក្នុងការកាត់បន្ថយអាវុធនុយក្លេអ៊ែរ។ យើងមានវាសនារួមក្នុងការរស់នៅក្នុងសន្តិភាព និងវិបុលភាព និងវាសនារួម ប្រសិនបើយើងជ្រើសរើសមិនអើពើនឹងផលវិបាកនៃការគំរាមកំហែងដ៏ពីអាវុធនុយក្លេអ៊ែរនៅលើពិភពលោកនោះទេ»។  

លោក Kucinich ដែលជាស្ថាបនិកម្នាក់នៃក្រុមការងារសភាតំណាងរាស្ត្រសហរដ្ឋអាមេរិកទទួលបន្ទុកការពង្រឹងមិត្តភាព ការយោគយល់គ្នាទៅវិញទៅមក និងកិច្ចសហប្រតិបត្តិការជាមួយរុស្ស៊ី បាននិយាយថា៖   «ចូរយើងធ្វើការចាប់ផ្តើមថ្មីមួយ ដើម្បីសន្តិសុខនៃប្រទេសយើងទាំងពីរ និងពិភពលោក។ ចូរចងចាំថា ផ្ទុយពីការចាប់ផ្តើម គឺការបញ្ចប់»៕