លោក Steve Witkoff ដែលជាបេសកជនពិសេសរបស់ប្រធានាធិបតីអាមេរិក លោក Donald Trump បាននិយាយនៅថ្ងៃព្រហស្បតិ៍ (ទី៥ ខែមករា) នេះថា គណៈប្រតិភូមកពីសហរដ្ឋអាមេរិក អ៊ុយក្រែន និងរុស្ស៊ី បានព្រមព្រៀងគ្នាលើការដោះដូរអ្នកទោសចំនួន ៣១៤នាក់ ដោយលោកបានបន្ថែមថា ការងារសំខាន់ៗដែលត្រូវធ្វើ នៅតែមាន ដើម្បីបញ្ចប់សង្គ្រាម។

តាមរយៈសារនៅលើបណ្ដាញសង្គម X លោក Witkoff បានឲ្យដឹងថា៖ «ថ្ងៃនេះ គណៈប្រតិភូមកពីសហរដ្ឋអាមេរិក អ៊ុយក្រែន និងរុស្ស៊ី បានព្រមព្រៀងលើការដោះដូរអ្នកទោសចំនួន ៣១៤នាក់ ដែលជាការដោះដូរលើកដំបូង ក្នុងរយៈពេល ៥ខែ។ លទ្ធផលនេះត្រូវសម្រេចបានចេញពីកិច្ចចរចាសន្តិភាពដែលត្រូវបានធ្វើឡើងយ៉ាងលម្អិត និងប្រកបដោយផលិតភាព។ បើទោះជាការងារសំខាន់ៗដែលត្រូវធ្វើ នៅតែមានក៏ដោយ ក៏ជំហានដូចនេះ បង្ហាញថា ការពាក់ព័ន្ធការទូតប្រកបដោយចីរភាព កំពុងផ្តល់លទ្ធផលជាក់ស្តែង និងជំរុញដល់កិច្ចប្រឹងប្រែង ដើម្បីបញ្ចប់សង្គ្រាម នៅអ៊ុយក្រែន»។

សម្រាប់ថ្ងៃដំបូងនៃកិច្ចចរចាថ្មីសម្របសម្រួលដោយសហរដ្ឋអាមេរិក នៅទីក្រុង Abu Dhabi ប្រទេសអេមីរ៉ាតអារ៉ាប់រួម កាលពីថ្ងៃពុធ អ្នកចរចាជាន់ខ្ពស់របស់ទីក្រុងគីវ បានចាត់ទុកថា បានប្រព្រឹត្តទៅ «ប្រកបដោយផលិតភាព» ទោះបីជាការប្រយុទ្ធគ្នា នៅក្នុងជម្លោះដ៏បង្ហូរឈាមបំផុតរបស់អឺរ៉ុប គិតចាប់តាំងពីសង្គ្រាមលោកលើកទី២ បានបន្តមានក៏ដោយ។

ប្រធានាធិបតីអ៊ុយក្រែន លោក Volodymyr Zelenskiy បាននិយាយថា អ៊ុយក្រែនរំពឹងថា កិច្ចចរចានេះនឹងនាំឲ្យមានការដោះដូរអ្នកទោសថ្មី។

លោក Witkoff បានបន្ថែមនៅលើបណ្ដាញសង្គម X ថា ការពិភាក្សានឹងបន្តធ្វើ ដោយវឌ្ឍនភាពបន្ថែមត្រូវបានរំពឹងទុកនឹងមាននៅក្នុងសប្តាហ៍ខាងមុខ។ តែយ៉ាងណាក្ដី ក្រុមប្រតិភូមិនបានផ្តល់ព័ត៌មានលម្អិត អំពីចំនួនអ្នកទោសដែលប្រទេសនីមួយៗ នឹងដោះដូរនោះទេ។ សេតវិមានមិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ នៅក្រៅម៉ោងធ្វើការធម្មតា៕