ដែនដី Greenland ស្ថិតក្នុងតំបន់អាក់ទិក គឺជាប្រធានបទក្តៅមួយនៅលើឆាកអន្តរជាតិ ។ កោះមួយនេះ ត្រូវបានប្រធានាធិបតីសហរដ្ឋអាមេរិកលោក Donald Trump ចង់បានយ៉ាងខ្លាំង ប៉ុន្តែដាណឺម៉ាក និងសហភាពអឺរ៉ុប ច្រានចោលការទាមទារគ្រប់គ្រងរបស់ទីក្រុងវ៉ាស៊ីនតោន ហើយឥឡូវ អាកាសធាតុក្តៅកើនឡើងយ៉ាងឆាប់រហ័ស បានក្លាយជាប្រធានបទថ្មីមួយទៀត ពេលដែលកោះ Greenland ជួបខែមករាក្តៅបំផុតជាប់កំណត់ត្រារបស់ខ្លួន ក្នុងឆ្នាំនេះ ។

វាក្តៅក្នុងអត្រា ៤ដងខ្លាំងជាងមធ្យមភាគសកល ហើយបម្រែបម្រួលអាកាសធាតុនេះ កំពុងផ្លាស់ប្តូរជីវិតរស់នៅទីនេះ លើការនេសាទក្នុងសមុទ្រ វិស័យទេសចរណ៍ ជីករ៉ែ និងការដឹកជញ្ជូន ។

ទិន្នន័យបឋមបង្ហាញថា សីតុណ្ហភាពមធ្យមកាលពីខែមុននៅទីក្រុង Nuuk ស្ថិតនៅលើកម្រិតកក ពោលគឺខ្ពស់ជាងកម្រិតសូន្យអង្សាសេ ។

អ្នកស្រី Caroline Drost Jensen គឺជាមន្រ្តីមកពីវិទ្យាស្ថានឧតុនិយមដាណឺម៉ា ស្ថិតក្នុងទីក្រុង Copenhagen និយាយថា សីតុណ្ហភាពអតិបរមាក្នុងខែមករានៅទីក្រុង Nuuk មានចំនួន ០,២អង្សាសេ ហើយតាមធម្មតានោះ ពួកយើងមើលឃើញសីតុណ្ហភាព -៧,៧អង្សាសេ ។

ចំណែកឯលោក Jacob Hoyer ដែលជាប្រធានមជ្ឈមណ្ឌលស្រាវជ្រាវបម្រែបម្រួលអាកាសធាតុជាតិរបស់វិទ្យាស្ថានឧតុនិយមដាណឺម៉ា និយាយថា នេះជាផែនទីទឹកកកសមុទ្រនៅក្នុងស្ថានភាពបច្ចុប្បន្ន ជាទីដែលពណ៌ក្រហមបង្ហាញថា ពួកគេយើងមានទឹកកករឹង ហើយពណ៌ស បង្ហាញថាពួកយើងមានទឹកកករាវ ។

លោកបន្តថា ដូច្នេះហើយ ផែនទីនេះបង្ហាញយ៉ាងច្បាស់ថា ពួកយើងមានស្ថានភាពអាកាសធាតុមួយខុសពីប្រក្រតី អំឡុងពេលនេះ ហើយកាន់តែខុសពីធម្មតាទៅទៀត នៅតំបន់ភាគខាងត្បូង ។

ទឹកក្តៅជាងមុន អាចនឹងផ្លាស់ប្តូរឧស្សាហកម្មនេសាទរបស់កោះ Greenland ដូចដែលពួកគេមាននៅកន្លែងផ្សេងទៀតដែរ ។ យោងតាមស្ថិតិកោះ Greenland បានឲ្យដឹងថា បង្គា ត្រីអណ្តាតឆ្កែដាណឺម៉ាក និងត្រីខកំប៉ុង គឺជាការនាំចេញធំបំផុត ហើយស្មើនឹង ២៣ភាគរយនៃផលិតផលក្នុងស្រុកសរុប(GDP) កាលពីឆ្នាំ ២០២៣ ។ ឧស្សាហកម្មមួយនេះ បង្កើតការងារ ១៥ភាគរយនៃការងារទាំងអស់នៅលើកោះ Greenland ៕