អគ្គលេខាធិការអង្គការសហប្រជាជាតិ(UN)លោក Antonio Guterres បានព្រមានពីការដួលរលំមនុស្សធម៌នៅប្រទេសគុយបា បើសិនជាថាមពលដែលពួកគេត្រូវការ មិនអាចទទួលបានទេនោះ ក្រោយសហរដ្ឋអាមេរិកព្យាយាមរារាំងប្រេងទាំងអស់ពីការចូលទៅក្នុងប្រទេសនៅតំបន់ការ៉ាអ៊ីបមួយនេះ ហើយនិងគំរាមដំឡើងពន្ធលើប្រទេសណាដែលចាត់វិធានការជួយ ។

ការព្រមាននេះ បានកើតមាន ស្របពេលជួបកង្វះខាតប្រេងឥន្ធនៈធ្ងន់ធ្ងរនៅក្នុងប្រទេសគុយបា ដែលជំរុញមានការដាច់ចរន្តអគ្គិសនីរយៈពេលច្រើនម៉ោង សូម្បីនៅទីក្រុងឡាហាវ៉ាន់ ក៏ដូចជាការហក់ឡើងខ្ពស់តម្លៃចំណីអាហារ និងការដឹកជញ្ជូន ។

លោក Stephane Dujarric គឺជាអ្នកនាំពាក្យរបស់លោក Guterres និយាយប្រាប់ក្រុមអ្នកសារព័ត៌មាននៅទីក្រុងញូវយ៉កថា ប្រមុខ UNមានក្តីបារម្ភជាខ្លាំងចំពោះស្ថានភាពមនុស្សធម៌នៅប្រទេសគុយបាដែលលោកនិយាយថា វានឹងកាន់តែធ្ងន់ធ្ងរខ្លាំង បើសិនជាមិនដួលរលំទេ បើសិនជាប្រេងត្រូវការមិនទទួលបានទេនោះ ។

ខណៈពេលនោះដែរ ប្រជាពលរដ្ឋគុយបា បានជំរុញឲ្យមានការសន្ទនាគ្នារវាងរដ្ឋាភិបាលរបស់ពួកគេ និងសហរដ្ឋអាមេរិក ដើម្បីបន្ធូរបន្ថយកង្វះខាតថាមពលដែលកោះមួយនេះ កំពុងជួបប្រទះ ។ 

លោក Luis Alberto Gonzalez គឺជាពលរដ្ឋមួយរូបរស់នៅក្នុងទីក្រុងឡាហាវ៉ាន់ និយាយថា គួរតែមានការសន្ទនារវាងគុយបា និងសហរដ្ឋអាមេរិក ។ 

លោកបន្តថា លោកចង់មានន័យថា បើទោះបីជាបញ្ហាទាំងអស់នៅមាន ហើយអ្វីៗនឹងត្រូវកើតឡើងក៏ដោយ លោកគិតថា ពួកយើងគួរតែនិយាយគ្នា រកផ្លូវដោះស្រាយបញ្ហា ក្នុងនាមជាសហភាព កិច្ចសន្ទនាដែលជាកិច្ចព្រមព្រៀងទៅវិញទៅមក ដែលអាចឈានដល់រវាងប្រទេសទាំង ២ ៕