ក្រសួងការបរទេសចិន និយាយនៅថ្ងៃព្រហស្បតិ៍នេះថា ចិនជំទាស់ប្រទេសណាមួយដែលធ្វើឲ្យអន្តរាយដល់សណ្តាប់ធ្នាប់សេដ្ឋកិច្ច និងពាណិជ្ជកម្មអន្តរជាតិ តាមរយៈច្បាប់ថ្មីដាក់ចេញដោយក្រុមតូច បន្ទាប់ពីសហរដ្ឋអាមេរិកបញ្ចេញផែនការសម្រាប់ប្លុកសម្ព័ន្ធមិត្តពាណិជ្ជកម្មអនុគ្រោះ សម្រាប់រ៉ែសំខាន់ៗ ។

 អ្នកនាំពាក្យក្រសួងការបរទេសចិនលោក Lin Jian និយាយថា ការរក្សាបរិស្ថានពាណិជ្ជកម្មអន្តរជាតិបើកទូលាយ រួមបញ្ចូល និងផ្តល់ផលប្រយោជន៍សកល គឺស្ថិតនៅក្នុងផលប្រយោជន៍រួមរបស់ប្រទេសទាំងអស់ ហើយភាគីទាំងអស់មាននូវទំនួលខុសត្រូវដើរតួរលក្ខណៈស្ថាបនា ក្នុងការការពារស្ថិរភាព និងសន្តិសុខខ្សែច្រវ៉ាក់ផ្គត់ផ្គង់សកល សម្រាប់រ៉ែសំខាន់ៗ ។

 លោកបន្តថា ក្នុងពេលតែមួយនេះដែរ ពួកយើងសូមជំទាស់រាល់ប្រទេសណាមួយប្រើប្រាស់ច្បាប់ តូច ដើម្បីធ្វើឲ្យអន្តរាយដល់សណ្តាប់ធ្នាប់សេដ្ឋកិច្ច និងពាណិជ្ជកម្មអន្តរជាតិ ។

គួរឲ្យដឹងថា កាលពីថ្ងៃពុធម្សិលមិញ សហរដ្ឋអាមេរិកបានបង្ហាញភាពជាដៃគូដ៏សំខាន់ លើវិស័យរ៉ែសំខាន់ៗជាមួយសហភាពអឺរ៉ុប (EU) និងប្រទេសជប៉ុន បន្ទាប់ពីមានការជួបជុំគ្នានៅទីក្រុងវ៉ាស៊ីនតោន ស្របពេលមានក្ដីបារម្ភកាន់តែខ្លាំងឡើង អំពីការក្ដោបក្ដាប់របស់ប្រទេសចិន នៅក្នុងវិស័យមួយនេះ ។ 

ការិយាល័យតំណាងពាណិជ្ជកម្មសហរដ្ឋអាមេរិក បានឲ្យដឹងនៅក្នុងសេចក្តីថ្លែងការណ៍មួយថា ដៃគូទាំងអស់ មានគោលបំណងអភិវឌ្ឍគោលនយោបាយ និងយន្តការពាណិជ្ជកម្មរួមគ្នា ដូចជាតម្លៃទាបស្របច្បាប់ដែលបានកែតម្រូវតាមព្រំដែន ជាអ្វីដែលអាចកាត់បន្ថយភាពងាយរងគ្រោះនៃខ្សែច្រវាក់ផ្គត់ផ្គង់រ៉ែសំខាន់ៗ ៕