ក្រុមឃ្លាំមើលសិទ្ធិមនុស្ស(HRW) បានចេញរបាយការណ៍ពិភពលោកឆ្នាំ ២០២៦ប្រចាំឆ្នាំរបស់ខ្លួន ដោយព្រមានថា ប្រព័ន្ធសិទ្ធិមនុស្សសកលលោក កំពុងស្ថិតក្នុងគ្រោះថ្នាក់ ក្នុងនោះ ៧២ភាគរយនៃប្រជាពលរដ្ឋរបស់ពិភពលោក បច្ចុប្បន្នកំពុងរស់នៅក្នុងអត្តាធិបតេយ្យ ។

នៅក្នុងរបាយការណ៍ដែលបានចុះផ្សាយកាលពីថ្ងៃពុធ ក្រុមសិទ្ធិមនុស្សមួយនេះ បានព្រមានថា សហរដ្ឋអាមេរិក ចិន និងរុស្ស៊ី ដឹកនាំដោយក្រុមមេដឹកនាំដែលចែករំលែកការមាក់ងាយច្បាប់ដោយបើកចំហរ ហើយនិងកាន់កាប់អំណាចការទូត សេដ្ឋកិច្ច និងយោធាដ៏លើសលប់ ។

ក្រុមតស៊ូមតិ និងស្រាវជ្រាវដែលមានមូលដ្ឋាននៅទីក្រុងញូវយ៉កមួយនេះ បាននិយាយទៀតថា ការវិលត្រឡប់ទៅកាន់សេតវិមានវិញរបស់លោក Donald Trump បានធ្វើឲ្យស្ថានភាពសិទ្ធិមនុស្សធ្លាក់កាន់តែខ្លាំងដែលបានរងសម្ពាធរួចទៅហើយពីរុស្ស៊ី និងចិន ។

ក្រុម HRW និយាយថា សណ្តាប់ធ្លាប់អន្តរជាតិផ្អែកលើច្បាប់ ត្រូវបានជាន់ឈ្លីគ្មានសេសសល់ ។ ពួកគេនិយាយថា នៅសហរដ្ឋអាមេរិក លោក Trump បានបង្ហាញការមិនអើពើចំពោះសិទ្ធិមនុស្សយ៉ាងច្បាស់ក្រឡែត និងការរំលោភបំពានយ៉ាងធ្ងន់ធ្ងរ ។

របាយការណ៍នេះ សរសេរទៀតថា ការដាក់ពង្រាយក្នុងស្រុក រើសអើងជនជាតិភាគតិច និងរើសអើងជាតិរបស់កងកម្លាំងឆ្មាំជាតិ បញ្ជាក់ម្តងហើយម្តងទៀតពីទង្វើសងសឹកលើគូសត្រូវនយោបាយ ស្គាល់មុខ ហើយនិងអតីតមន្រ្តីដែលបច្ចុប្បន្នរិះគន់រូបលោក ក៏ដូចជាការប៉ុនប៉ងពង្រីកអំណាចប្រតិបត្តិដោយបង្ខំ ការត្រួតពិនិត្យតុល្យភាព និងប្រជាធិបតេយ្យអព្យាក្រឹត ជាការគាំទ្រយ៉ាងច្បាស់ក្រឡែតឆ្ពោះទៅរករបបផ្តាច់ការនៅសហរដ្ឋអាមេរិក ។

ក្រុមឃ្លាំមើលសិទ្ធិមនុស្ស បានបញ្ជាក់ម្តងហើយម្តងទៀតពីការរកឃើញរបស់ពួកគេថា សហរដ្ឋអាមេរិក បានជាប់ពាក់ព័ន្ធនឹងការបាត់ខ្លួនដោយបង្ខំ គឺជាឧក្រិដ្ឋកម្មមួយក្រោមច្បាប់អន្តរជាតិ តាមរយៈការបញ្ជូនជនអន្តោប្រវេសន៍វេណេស៊ុយអេឡា ២៥២នាក់ ទៅកាន់ពន្ធនាគារមានសន្តិសុខអតិបរមា នៅដែនដី អែល សាល់វ៉ាឌ័រ ៕